“LgSC” struodoj pi bīdreibys aktivistu leluokys komandys sajiutys radeišonys
Bīdreiba “LgSC” ar Aktivūs īdzeivuotuoju fonda (AIF) atbolstu turpynoj struoduot pi organizacejis kapacitatis styprynuošonys. 31. oktobrī ūtrū reizi nūtyka “LgSC” bīdru sasatikšona, kab struoduotu pi bīdru i bīdreibys izaugsmis i leluokys kūpeibys sajiutys.
Svātdīnis, 31. oktobra, reitā vīnpadsmit “LgSC” aktivī i itūšaļt bīdreibys dorbā mozuok īsaisteitī bīdri sasatyka ūtrajā bīdru i bīdreibys izaugsmis i kūpeibys styprynuošonys programys reizē, kab ar dažaidim vingrynuojumim i aizdavumim struoduotu pi tuo, kai, kūpā dorūt i sasadorbojūt, kaidai idejai, dorbam voi lītai dadūt vēļ leluoku vierteibu i sasnēgt piec īspiejis lobuoku rezultatu.
“LgSC” apvuiceibu programys vadeituoju, izaugsmis platformys MeYou.One treneri Ieva i Henriks (Henric) Johansoni (Johansson), vadeibā sasatikšonys dalinīkim ar teoretiskim i praktiskim aizdavumim, kab sasnēgtu izvierzeitūs mierkus, tyka atguodynuots, ka:
- juorauga byut proaktivim, juoizavielej dareit lītys i spert pyrmū sūli;
- juozyna mierkis, iz kurū teik kūpeigi īts;
- nav gona viņ ar lobom idejom, juosasarunoj i kūpā juosavīnoj par konkretim mierkim;
- juoplanavoj dareišona i sūli mierku sasnīgšonai;
Sasatikšonys laikā kai pa puorim, tai leluokuos grupuos dalinīki struoduoja ar konkretom idejom, kuruos bīdreiba varātu eistynuot kūpeigā dorbā. Taipat kai sātys aizdavums itūreiz sasatikšonys dalinīkim tyka aizdūts sagataveit vizeju par kaidu poša ideju, kū bīdreiba varātu eistynuot, i precizi juoatbiļd iz vaicuojumim, kod ideja tiks eistynuota:
- Kai izavērs lītys tī apleik?
- Kai pīpiļdeita ideja izaklauseis?
- Kaidys byus sajiutys, kod ideja tiks eistynuota?
Apvuiceibu programys sasatikšona nūtykuse jau majā, tū paradzāts turpynuot decembrī i janvarī, kai ari julī bīdreibys bīdri izmontuoja īspieju pīsadaleit individualajuos koučinga sesejuos. “LgSC” bīdru i bīdreibys izaugsmis i mentoringa programā var īsasaisteit kotrys “LgSC” bīdrys voi potencialais interesents sevkurā breidī. Vaira dazynuot var, rokstūt Edeitei edeite@lgsc.lv.
Nu 2021. goda 1. maja da 2022. goda 30. apreļa bīdreiba “LgSC” eistynoj projektu “Bīdreibys “LgSC” kapacitatis styprynuošona pylsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā”. Projekts sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja. Sajimtais atbolsts 19 994,87 €. Vaira par projektu var izzynuot ite: https://lgsc.lv/aktivus-idzeivuotuoju-fonds/.
