Aizvadeita “LgSC” kūpsapuļce i īvālāta jauna vaļde

7. martā pyrmū reizi tīšsaistē tyka aizvadeita bīdreibys “LgSC” kūpsapuļce, atsaverūt iz padareitū 2020. godā i puorrunojūt iz prīšku īcarātūs planus.

Kai īrosts nūtyka ari bīdreibys vaļdis puorvieliešona. “LgSC” vaļdis sastuovā tyvuokūs div godus dorbuosīs Edeite Husare, Kristīne Pokratniece i Laura Melne. Vaļdis sēdē par bīdreibys prīšksādātuoju tyka īvālāta Edeite Husare, par juos vītineicu – Kristīne Pokratniece.

Vaļde lēme, ka iz prīšku vaļdis sēdis nūtiks kotra mieneša pyrmajā ūtardīnē cikom tīšsaistē, īcarātais laiks septeņuos stuņdēs vokora (var maineitīs atkareibā nu situacejis). Sēdis ir atkluotys i tymuos var pīsadaleit kotrys grybātuojs, tik lyugums pyrma tuo da mieneša pyrmuos ūtardīnis pušdīnis laika (12.00) atsyuteit viesti iz e-postu lgsc@lgsc.lv, kab varātu piečuok aizsyuteit sēdis datikšonys saiti.

Taipat kūpsapuļcis dalinīki tyka īpazeistynuoti ar bīdreibys darbeibu 2020. godā i planim 2021. godam.

Svareiguokī 2020. goda bīdreibys darbeibys pīturys punkti:

2020. godā pījimtuos izmainis, kas skar “LgSC” statutus:

• Maineits bīdreibys nūsaukums nu “Latgolys Studentu centrs” iz “LgSC”
• Veikti statutu lobuojumi – niu vaļde teik īvālāta iz diveju godu
• Kūpsapuļcē pīsadaleit var ari tīšsaistis variantā

Tyka sajimts Vaļsts kulturkapitala fonda (iz prīšku VKKF) finansiejums projektā “Atbalsts latgaliskās kultūras aktivitātēm 2020. gadā” (7000 EUR), lai nūdrūsynuotu bīdreibys pamatdarbeibu, projektu raksteišonu, eistynuotu dažaidys aktivitatis portalā lakuga.lv.

Atjaunuota LgSC sātyslopa lgsc.lv.

Nūdrūsynuota Latgalīšu kulturys ziņu portala lakuga.lv darbeiba – portalā publicāti 297 roksti. Eistynuoti projekti:

• Latgaliska satura radīšana portālā lakuga.lv 2020. gada pirmajā pusē (VKKF, 8000 EUR)
• Latgales kultūrtelpa: problēmas, analīze un atspoguļojums portālā lakuga.lv (SIF, 9879,85 EUR)
• Atbolsts latgaliska satura radeišonai portalā lakuga.lv (VKKF LKP, 7500 EUR)
• Digitālā Latgale portālā lakuga.lv (VKKF, 2200 EUR)

Cytys portala aktivitatis:

• WhatsApp i Telegram stikeri
• Akceja “Latgalīšu volūdai draudzeiga vīta”
• Facebook profila biļžu latgaliskī rameiši
• Pasauļa diktats latgalīšu rokstu volūdā (sadarbeibā ar Latvejis Radejis Latgolys studeju)
• Prozys skaitejumu uzvarātuoju video īroksti;
• Nūdrūsynuota koncerta “Dzīšmu gruomota” tīšraide;
• Pasuokuma “Suprātka Kuorklinīkūs jeb Andryvam Jūrdžam – 175” tīšraide;
• Online lekceja “Revitalization of the Latgalian language”;
• Portala redaktore Vineta Vilcāne tyka nomināta Latgalīšu kulturys goda bolvai “Boņuks 2020”.

Turpynuojās projekta COLING – “Minority Languages, Major Opportunities. Collaborative Research, Community Engagement and Innovative Educational Tools” (projekta eistynuotuojs Varšavys Universitate, LgSC kai sadarbeibys partners) – dorbi. Aktiva projekta eistynuošona gon apsastuojuse pandemejis īrūbežuojumu deļ, jo projekts paradz pietnīceibys braucīņus i kluotīnis storptautysku pasuokumu reikuošonu.  

Darbeibu turpynuojuse LgSC folklorys kūpa “Ceidari” (cik īrūbežuojumi ļuovuši).

2020. goda suokumā izguojs leluokais latgalīšu dzīšmu notu i vuordu kruojums “Muna dzīšmu gruomota”:

• Nominaceja Latvejis Sabīdryskuo medeja “Kilograms kultūras” 2020. goda pavasara bolsuojumā;
• Latgalīšu kulturys goda bolvys “Boņuks 2020” sajiemiejs;
• Sadarbeibā ar Latgolys viestnīceibu GORS eistynuots koncerts “Dzīšmu gruomota” (pīsaisteits finansiejums projektā “Latgaliešu dziesmu stāsti koncertprogrammai “Dzīšmu gruomota”” (VKKF, 2500 EUR)), nūdrūsynuota koncerta tīšraide lītuotnē “LMT Straume” i portalā lakuga.lv, koncertu vēļ arvin aktivi translej Re.TV i TV4.

2020. goda beiguos/2021. goda suokumā izdūts Sandrys Ūdris stuostu kruojums “Tīsys syla bolsi” (projekts “Sandras Ūdres stāstu krājuma “Tīsys syla bolsi” izdošana” (VKKF LKP, 2126,97 EUR))

Aizsuokts dorbs pi izdavuma “Trusīni vessim reitā pi puiša” izdūšonys (projekts “Izdavums “Trusīni vessim reitā pi puiša”” (VKKF LKP, 2500 EUR), dorbi drupeit aizakaviejuši, publiski paradzāts prezentēt 2021. goda pavasarī.

Plani 2021. godam:

2021. goda planūs kai prioritate vēļ arviņ ir latgalīšu volūdys atteisteiba i tai veļteitys aktivitatis.

Latgalīšu kulturys ziņu portala lakuga.lv uzturiešona i atteisteišona:

• Redakcejis sastuova izmainis;
• Aktiva darbeibys atsuokšona piec puora mieniešu pauzis nu 2021. goda 1. apreļa
• Latgaliskūs ziņu platformu i formatu paplašynuošona;
• Sajimts finansiejums projektā “Latgaliskās kultūras dokumentēšana 2021. gadā portālā lakuga.lv” (VKKF, 20 000 EUR)
• Sagataveiti i īsnēgti vēļ četri projekti portala atteisteibai, teik gaideiti rezultati.

Atbaļsteits i paradzāts eistynuot Aktivūs īdzeivuotuoju fonda (iz prīšku AIF) projektu “Biedrības “LgSC” kapacitātes stiprināšana pilsoniskās sabiedrības un iedzīvotāju līdzdalības veicināšanai un to interešu pārstāvībai Latgales reģionā” (daškiertais finansiejums 19 995 EUR), itūšaļt nūteik projekta leiguma nūsliegšonys sakuortuošonys dorbi i preciziejumu īsnēgšona. Projekts paradz bīdreibys kapacitatis styprynuošonu:

• bīdreibys strategejis sakuortuošonu;
• bīdru apvuiceibys;
• zīduošonys kampanis eistynuošonu;
• bīdreibys zeimyna sataiseišonu;
• bīdreibys komunikacejis plana sataiseišonu i eistynuošonu;
• storptautyskūs sadarbeibys partneru lūka paplašynuošonu;

Planavuots atsuokt COLING projekta aktivitatis (cik īrūbežuojumi ļaus). Vīna nu aktivitašu – sadarbeibā ar Adama Mickeviča Poznanis Universitatis (Pūleja) profesori Nikoli Nau tops losomuo gruomota latgaliski vydsškolānim.

Turpynuosīs bīdreibys folklorys kūpys “Ceidari” darbeiba

• Itūšaļt kasnedelis mieginuojumi nūteik attuolynuoti (grybātuoji pīsavīnuot aicynuoti raksteit lgsc@lgsc.lv);
• Planavuots suokt dorbu pi Bierzpiļs pusis dzīšmu albuma īraksteišonys (itūgod izpietis daļa).

Apstyprynuots “Valodu māja” projekts “Latgaliešu un jaunnorvēģu valodas izstāde: sadarbība un pieredze mūsdienīgu digitālu risinājumu izstrādē”, kurā LgSC konsultēs “Valodu muzeju”, kai ari pīsadaleis pietnīcyskajā dorbā i tekstualuo satura i konceptualuos pīejis izstruodē. Projekts juoeistynoj da 2023. goda augusta.

Planavuots dorbs pi Juoņa Cybuļska manuskripta par P. Miglinīka dzymtu izdūšona latgaliski i angliski, kai ari Juoņa i Viktora Cybuļsku stuostu izdūšona latgaliski i angliski (pīsaisteits privats finansiejums).

Sajimts atbolsts projekta “Grāmatas “Līvānu novads tradīcijās, dziesmās un stāstos” manuskripta sagatavošana izdošanai” eistynuošonai 2021. godā (VKKF, 1500 EUR).

Sagataveiti i Latgolys Kulturys programā i VKKF mierkprogramā “Kultūrelpa” īsnēgti projekti, kas gaida rezultatus, padareišonai 2021. godā:

• Gruomotys “Līvānu novads tradīcijās, dziesmās un stāstos” izdūšonai;
• Latgalīšu volūdys aplikacejis sataiseišonai;
• Ilzis Spergys dzejis kruojuma pīaugušajim “Rudiņa bolsi” izdūšonai;
• Ilzis Spergys stuostu kruojuma “Dzeiveiba” radejis lasejumu sagataveišonai (sadarbeibā ar Latvejis Radejis Latgolys multimedeju studeju);
• Sibira etnolingvistiskūs ekspediceju materialu publiskuošona;
• Dzejūļu i dzīšmu kruojuma bārnim “Vuškeņa iz pļovys” izdūšonai.

Planavuots nu 2022. goda atjaunuot (bet dorbu pi tuo suokt jau 2021. godā) i reizi godā taiseit kaidu nu seminaru – “Atzolys” (jaunīšim), “Roksti!” (pīaugušajim car raksteibys prizmu) i atbaļsteit vosorys školys školuotuojim “Vosoruošona” nūtikšonu.

Ka ir idejis i iniciativys kūpā dareišonai, drūsai aicynojam sasazynuot ar bīdreibys vaļdi, rokstūt lgsc@lgsc.lv.