Sajimts atbolsts Latgolys kulturys programā
Bīdreiba “Latgolys Studentu centrs” sajāmuse atbolstu treis projektu eistynuošonai 2020. gods Latgolys kulturys programā. Finansiejums sajimts medeja “Latgalīšu kulturys ziņu portals lakuga.lv” darbeibys nūdrūsynuošonai i diveju gruomotu izdūšonai – sveicīšu muokslinīka i muzika Vincenta Flikigera i latgalīšu kulturys aktivistis Edeitis Husaris gruomotai “Trusīni vessim reitā pi puiša” i literatis, publicistis Sandrys Ūdris stuostu kruojumam “Tīsys syla bolsi”.
Portals lakuga.lv dorbojās jau nu 2007. gods i ir vīneigais medejs pasaulī, kura saturs ir tikai latgalīšu rokstu volūdā. “Latgalīšu kulturys ziņu portalā lakuga.lv” var skaiteit par Latgolys i latgaliskuos kulturys aktualitatem, intervejis ar sabīdreibā zynomim cylvākim, kai ari atrast vierteigus materialus latgalīšu volūdys zynuošonu uzlobuošonai. Latgolys kulturys programā finansiejusm sajimts portala darbeibys nūdrūsynuošonai pīcu mienešu garumā.
Izdavuma “Trusīni vessim reitā pi puiša” idejis autors ir šveicīšu muokslinīks i muzikis Vincents Flikigers (Vincent Flückiger), kurs jau vaira nikai desmit godu ilgi regulari gastej Latvejā, Latgolā, jādz latvīšu volūdu i ceņteigi vuicās latgalīšu volūdu. Muokslinīks dorbojās pasauļa teikla grupā “Urban Sketchers”, kurymā apsavīnuojuši zeimātuoji, kas paruoda vidi sev apleik viņ mirkļa īspaidā i tūs spylgtajā dažaideibā. 2015. godā Leivuonā, Rēzeknē i Daugovpiļs nūvodā, kai ari Čehejā beja apsaverama muokslinīka zeimiejumu izstuode “Latgale laiku ritā” (nomināta ari Latgalīšu kulturys goda bolvai “Boņuks”), kurymā paruodeita lauku dzeive Latgolā – šaļtenis nu sadzeivis ar tradicionaluo kulturys montuojuma īmyužynuošonu, kuruos pīdzeivuotys diveju nedeļu garumā. Ituo izdavuma ideja – apvīnuot eisus i kūduleigus tekstus, kuru radeišonys izaicynuojumam ļuovusēs Edeite Husare, ar Vincenta zeimiejumim, rodūt myusdīneigu izdavumu par Latgolys šudiņdīnu. Izdavumā paradzāts publicēt 30 zeimiejumus i 30 tekstus (latgaliski i tulkuot angliski). Daļa zeimiejumu beja apsaverami Vincenta Flikigera izstuodē “Latgale laiku ritā”, daļa tūp speciali izdavumam, bet vysi teksti byus pyrmpubliciejums. Izdavums tiks papyldynuots ar 3 postkartem. Taipat nu novembra vyda da decembra vyda paradzāts, ka Rēzeknis nūvoda Lūznovys myužā eipaši taiseitā izstuodē byus apsaverami izdavumā īkļautī Vincenta Flikigera zeimiejumi.
Sandrys Ūdris īcarātuo stuostu kruojuma “Tīsys syla bolsi” golvonuos kvalitatis saisteitys ar latgalīšu rokstu volūdu i latgalīšu literaturai jaunom koncepcejom. Vysūs stuostūs apraksteitais nūteik Latgolā dažaidūs laikūs, bet kotram stuostam maklāts atškireigs kompozicionalais rusynuojums.
Itys stuostu kruojums pīduovuos na tikai literari baudomus tekstus, tys ari uzdūs laseituojam vaicuojumus, cik jis ir īkšeji breivs i vardarbeibu napīļaunūšs – pret sevi, pret vuojuokū, saimē i sabīdreibā vyspuor. Kruojuma autorei nūsastyprynuojuse puorlīceiba, ka Latgolys izaugsmis leluokais kavieklis ir īkšeji nabreivi cylvāki, kas paaudzēs īsavuicejuši maskētīs. Itei byus Sandrys ūtruo gruomota, 2016. godā sadarbeibā ar Juoni Ryučānu izguoje romans “Aizlauztais spaits : Franča Kempa dzeivis atspīdynuojumi”.
