“Zynuot” pusmaratons nūsasliedzs
„Latgolys Studentu centra” Rēzeknis birojs eistynuoja projektu „Zynuot” , kas beja baļsteits iz Rēzeknis nūvoda školānu informiešonu par myusdīnu pasuokumim i cylvākim Latgolā.
Ideja par projektu roduos piec Latgalīšu kulturys goda bolvys „Boņuks 2013” ceremonejis, kod īsaroduši beja puorsvorā daleibnīki i nominanti, bet nu jaunīšim puorstuovju moz. Lela daļa Rēzeknis nūvoda jaunīši nimoz ari nazyna, ka ir taida Latgalīšu kulturys goda bolva i kam jei teik pasnāgta. Tai tyka izvālātys 10 nūvoda školys, piec informacejis – vysmozuok aktivuokuos. Nu vysom izvālātojom asom pabejuši viņ Rēznys pamatškolā, Kalnezeru katuoļu pamatškolā, Audriņu pamatškolā i Drycanu vydškolā. Iz puorejuom školom – Maltys vydškolu, Feimaņu pamatškolu, Makašānu omotu vydškolu, Rykovys pamatškolu, Bieržgaļs pamatškolu i Gaigalovys pamatškolu – brauksim jaunajam vuiceibu godam īzasuokūt. Braukojūt pa školom i runuojūt ar jaunīšim, gryušuok beja tī, kur školāni narunoj pat latviski, deļ tam saguoja sasaskart ar vysaidu attīksmi nu školānu pusis. Bet prīcej taida līta, ka niule vysi jī zyna, kas ir „Boņuks”. Vīnā nu školom beja vaicuojums par „Boņuku”: „это как «Оскар» только в Латгалии?”
Ar jaunīšim apsprīdem ari latgalīšu muzyku, mozuok gon tūs, kas vaira namuzicej, bet vaira taidus, kas “atsamūduši”, izaveiduojuši. Stuostiejom, ar kū grupys ir paruodiejušys sevi i kaidūs Latvejis mārūga pasuokumus pīsadaliejušys. Piec tam taisiejom viktorinu, nūsaklausiem kaidu dzīsmu apgrīztus “gobolus” i lykom jaunīšim uzminēt, kas tei par grupu ir. Prīca, ka beja ari zynuotuoji. Ka īprīkš pasalyka, ka grupu “Bez PVN” Latgolā vysi jaunīši zyna, tod nasasatraucit – nazyna gon! I pat na tik daudz ,kai grybātūs…
Literatura deļ školānim beja poša garlaiceiguokuo daļa, bet raudziejom ari tū naipalaist garom. Pastuostiejom par spylgtuokajim tuos puorstuovim, taidim kai Ontons Slišāns, Ontons Kūkuojs, nu myusdīnu literatim – Ilze Sperga, Raibīs, Valentīns Lukaševičs. Leidza beja ari gruomatenis, kū īdūt apsavērt i paskaiteit. Ar skaiteišonu tod nu guoja kai nu kuram, cytam vīgluok, cytam gryušuok.
Gon suokumā, gon beiguos jaunīšim uzdevom vaicuojumus, tik suokumā atbiļdēt jī navarieja, bet piec prezentacejis atbiļdis tūmār sajēmem. Tys līk dūmuot, ka na veļti sasatraucom, kai nu byus. Tāņ, īzasuokūt jaunam vuiceibu godam, turpynuosim braukuot iz školom, kai tys ir paradzāts projektā.
Ingūna Semule
