LgSC jau 8 godi!

Ar nūpītnom i na tik nūpītnom aktivitatem 2. novembrī Daugavpilī tyka aizvadeits bīdreibys „Latgolys Studentu centrs” 8 godu jubilejs. Iz pasuokumu beja sabraukuši LgSC bīdri i atbaļsteituoji nu puorejim birojim – Reigys, Jelgovys i Rēzeknis. Pasuokums tyka organizāts divejuos daļuos – pyrmajā jaunī bīdri tyka īpazeistynuoti ar bīdreibys viesturi, izdareitajim dorbim, tyka īzeimāti bīdreibys darbeibys vierzīni i nuokūtnis plani, ūtruo daļa beja vaira naformala – vīnam ūtra īpazeišona, kūpeigys spēlis i sarunys.

Itūbreid LgSC dorbojās cīši daudzuos jūmuos, kurys ir saisteitys ar kulturu – teik reikuoti leluoki i mozuoki kulturys pasuokumi, apvuiceibys jaunīšim, konkursi, koncerti, gruomotu izdūšona i tierguošona, latgalīšu ziņu portala (lakuga.lv) uzturiešona i c. Iz prīšku LgSC planavoj sovu darbu saisteit na tik ar kulturu, bet ari socialajom i ekonomikys lītom. Pasuokumā tyka izvārtāts vaicojums ari par LgSC kai jaunantnis organizaceju, sadarbeibys īspiejom i pīduovojumim nu cytu organizaceju, nuokūtnis planim iz prīšku. Vaira ar izstruoduotajim prīkšlykumim LgSC bīdri varēs īsapazeit bīdru kūpsapuļcē, kura teik planavuota 2014. goda februarī.

Kai jau jubilejis reizī pīsakluoj, naformaluo daļa tyka atkluota ar dzīsmi i sveceišu nūpyusšonu LgSC 8 godu tortā. Vokora gaitā caur interesantom spielem, sarunom i saguojušajim gostim beja īspieja vairuok īpazeit vīnam ūtru i sasadraudzēt. Kai izaruodeja, kluotasūšūs vydā beja vysaidys naparostys personeibys – vīns kuop kolnūs, cyts muzicej ci roksta dzeju, vēļ kaids cīši daudz runoj. I taidā jaukā nūskaņā Daugavpiļs birojs dreiži palyka par eistynu sātu, kur saguojuse leluo „Latgolys Studentu centra” saime i draugi.

Grybātūs nūvēlēt, lai iz 9 godu jubileju LgSC byutu vēļ cīšuoka saime i mes vysi kūpā varātu padareit daudz nūzeimeigu dorbu pošu i Latgolys atteisteibā!

Agnese Timofejeva

LgSC Daugavpils birojs