LgSC kūpsapuļce aizvadeita

Sasatikšonys i īsapazeišonys prīks, smaidi i smīkli, draudzeiba i jaunys idejis – tys vyss vyrmuoja gaisā jaunīšu bīdreibys „Latgolys Studentu centrs” kūsapuļcē, kas nūtyka 9. februarī Reigys jaunīšu centrā „Kaņieris”.

Var drūsai apgolvuot, ka LgSC ir vīna nu spieceiguokajom latgalīšu organizacejom, kura ar padareitajim dorbim ir īgivuse atpazeistameibu na tikai latgalīšu vydā, bet arī vysā Latvejā. Panuokumu atslāgs ir jaunīšūs asūšuo energeja, uzjiemeiba, ticeiba sovim spākim i sirdī asūšais studenta gors, kas nazyud ari piec studeju beigšonys. Par tū, ka nikas tu tuo nav zuds, varēja puorsalīcynuot kūpsapuļcis laikā, kod tyka atsavārts iz izdareitū i runuots par nuokūtnis planim. Par tū, ka latgalīšu jaunīši ir uzjiemeigi i nasabeist izaicynuojumu, līcynoj Dairys Kokorevičys paveiktais; jei beja īsaroduse, lai pastuosteitu, kai topa Latvejis Radejis raidejums „Kolnasāta”. Natyka ari aizmiersts par tim bīdrim, kas LgSC ir bejušs nu pyrmsuokumim, padarejušs organizacejis lobā daudz i da šam nikur nav pazudušs. Pi eipašajom skrūzem kai pateiceibys simbola par padareitū tyka Artis, Ilona, Jurs, Muora, Ilze i Edeite.

Aizvadeitais gods LgSC beja dīzgon ražans, ir tykušs realizāti 7 projekti – izdūti diveji dzejūļu kruojumi – Ingrīdys Tāraudys „Boltais šokolads” i Annys Rancānis „Pylni kārmani dabasu/ Bezdelīgu pasts”, ari „lakuga.lv” ir dorbujusēs, pasateicūt bīdreibys realizātajam projektam, taipat aizvadeitajā godā tyka sajimts finansiejums LgSC administrativūs vajadzeibu segšonai, tyka braukts iz Latgolys školom i vuiceits jaunīšim par latgalīšu rokstu volūdu i vosorā tyka reikuots seminars „Roksti!”, taipat ari organizacejai tyka pīsaisteiti vairuoki breivpruoteigī ar NVA programmys storpnīceibu. Dorbs pi projektim naapsastuoj, i LgSC ir vysod kusteibā, jau janvarī ir suokta nuokamūs projektu eistynuošona, vairuokim projektim teik gaideiti rezultati, i pruotā jau vyrmoj idejis par nuokušajim. LgSC na tykai struodoj, bet muok ari atsapyst, par tū līcynoj gon muzykalī, gon literaturys pasuokumi, gon kūpeigys saīšonys, kod balliešonuos reizem beidzās tikai ar reita gaismeņu.

LgSC dorbojās tī, kur ir vysvairuok latgalīšu studentu, – piļsātuos, kur ir augstškolys i universitatis. Jau vairuokus godus LgSC biroji ir Reigā i Daugovpilī, aizvadeitajā godā darbeiba Riezeknis birojā beja apseikuse, bet bīdreibai ir pīsavīnuojušs jaunīši, kas ir gotovi atsuokt dorbu. Bet vysuleluokuo prīca ir par Jelgovys latgalīšu studentim, kuri pīduovuoja izveiduot LgSC Jelgovys biroju, kas ari tyka izdareits 2012. goda oktobrī.

Kūpsapuļcē tyka īvālāta jauna vaļde – Dagneja Bramane, Kristīne Pokratnīce, Valērijs Kušnirs, Elmārs Ciganovičs i Renārs Kancāns. Nav nikaidu šaubu, ka nuokamais gods deļ LgSC byus pylns pozitivu puormaiņu, jaunu ideju i lelu sasnīgumu.

LgSC vysod ir bejs atvārts sabīdreibai i sovā puļceņā prīcojās redzēt kotru, kam gribīs pabyut latgaliskā vidē, gribīs realizēt sovys idejis i izdareit lobu dorbu Latgolys i leidz ar tū vysys Latvejis lobā!

Kūpā jautruok – pīsavīnoj myusim!

 

Vineta Vilcāne