Rodušūs dorbu konkurss „Tai beja – tai ir”
Vasals, Latgolys jaunīt! 
Cīši īspiejams, ka mes ar Tevi jau asam sasatykuši bīdreibys „Latgolys Studentu centrs” projekta „Vuiceisimēs latgalalīšu rokstu volūdu” laikā. Ka atguodoj, tī mes vuicevomēs latgalīšu rokstu volūdys paeizraksteibys nūsacejumus, atkuortovom jau aizmierstūs latgalīšu vuordus, runovom par latgalīšu rokstu volūdys nuokūtni, kai i par cytim ar Latgolu saisteitim vaicojumim.
Projekta laikā ar Kulturys Ministrejis atbolstu, saguoja pabyut 12 Latgolys školuos. Ka itū reizi myus nasaguoja sasatikt i pabyut Tovā školā – nabādoj – gon jau kur tiksimēs cytu reizi.
Taitod – pīduovojam Tev i vysim Latgolys školu jaunīšim pīsadaleit jaunīšu rodušūs dorbu konkursā ar nūsaukumu „Tai beja – tai ir”.
Ka, atguodoj, vuiceišonuos laikā mes runovom par sovpateigim latgalīšu vuordim, kurus juogluob nu pagaisšonys. Vysu vaira taidus vuordus nu apleicīņa zyna myusu babys i dzedi, tāvs i muote, sābru vacuos taņtis. Deļ tam nūej da jūs i pavaicoj – kai beja senejūs laikūs, kaidus latgalīšu vacvuordus voi vītu nūsaukumus jī zyna, varbyut solā/ sādžā/ dzeraunē ir bejs kaids cylvāks, kas stuostejs daudzi jūku i baba tū pīmiņ i var puorstuosteit? I Tu, rokstūt sovu rodušū dorbu konkursam, vari jimā pīraksteit na tik sovys dūmys, bet ari dzierdātūs vuordus, izteicīņus, deļ tam lai mes na tikai īsapazeitu ar Tovu dorbu, bet veļ izzynuotu ari kū vaira par Tovu pusi, juos volūdys boguoteibu.
Raksteit Tu vari: stuostu, eseju, literarū puorsoku, humoresku, aprokstu, dzeju i.c. da divom lopom datorrokstā, da 4000 rokstu zeimu voi da divom A4 lopom, fonts: Times New Roman, burtu izmārs – 12. atstarpis storp ryndom -1,5 pt.
Sovus rodušūs dorbus prosam Tev atsyuteit myusim pa e-postu iz adresu: lgsc-konkursam@inbox.lv da 25. juļa. Ka grybi, pi sova darba dalīc ari kaidu poša fotograpeitu biļdi – deļ nūskanis radeišonys. Naaizmierst pīraksteit sovu vuordu, pavuordi, vacumu, vuiceibu īstuodi, e-postu i kontakteleponu.
Tevis atsyuteitūs dorbus viertēs LgSC projekta „Vuiceisimēs latgalīšu rokstu volūdu” dorba grupa: Dagneja, Eva, Zaiga, Valentins, Ivars-Juoņs i pīaicynuotī literaturys i volūdys specialisti. Dorbūs tiks vārtāta literaruo, muokslinīcyskuo kvalitate i latgalīšu rokstu volūdys pareizraksteiba. Pamatškolānu i vydsškolānu dorbi tyks vārtāti atseviški.
Konkursa rezultatus publicēsim LgSC sātyslopā https://lgsc.lv 1. augustā, a 10 lobuokūs dorbus nu 1. augusta da 5.augustam publicēsim sātyslopā „lakuga.lv”.
Vaira informacejis par rodušūs dorbu konkursu verīs nūlykumā. Ka ir kaidi vaicojumi, roksti myusim iz lgsc-konkursam@inbox.lv.
Byus prīca puorskaiteit Tovus radūšūs dorbus!
Konkursa_Tai beja tai ir_nulikums
LgSC projekta „Vuiceisimēs latgalīšu rokstu volūdu!” dorba grupa.