Annys Rancānis dzejis kruojuma atvieršonys svātki

Apreļa vydā izguoja dzejneicys i publicistis Annys Rancānis dzejis kruojums latvīšu literarajā volūdā i latgalīšu rokstu volūdā „Pylni kārmani dabasu / Bezdelīgu pasts”. Niu dzejneica, bīdreiba „Latgolys Studentu centrs” i Raiņa i Aspazejis muzejs aicynoj iz kruojuma atvieršonys svātkim 16. majā 18:00, Raiņa i Aspazejis sātā, Bazneicys īlā 30, Reigā.

Atvieršonys svātku programā gon pošys Annys Rancānis autorskaitejumi, gon Latvejis Nacionaluos operys solistis Evitys Zuoleitis muzykals prīšknasums.

Dzejūļu kruojumam ir divejis dalis — latgaliski i latvyski raksteituo, jam ir diveji vuoki, diveji nosaukumi i divejis pusis. Tok tei ir vīna gruomota, kū sastatejuse poša autore, salīkūt kūpā tekstus, kas itūšaļt ruodīs svareiguokī sarunā ar sovu skaiteituoju, dzejis volūdā viestejūt par myusu laiku i myusu dīnu Latveju i īprīkš raksteitūs tekstus īpynūt kai bejušuo laika citatus — sova i tautys spāka i vuojuma zeimi.

Dzejūļu kruojumu izdavuse bīdreiba „Latgolys Studentu centrs”, finansiali atbaļstejuse Latgolys Regionaluos atteisteibys agenturys administreituos Latgolys kulturys programa ar Vaļsts Kulturkapitala fonda finansiejumu.

Gruomotys latvīšu dalis redaktore i korektore Sigita Kušnere, latgalīšu dalis — Ilze Sperga. Vuoku muokslineica i maketietuoja Iveta Zāgere.