Paļdis! I ejam tuoļuok

Pādejuos nedelis laikā LgSC ir sajiems vairuokys atzineibys par sovu dorbu 2008. godā: pīcus Boņukus i nominiešonu NVO instituta reikuotajā sabīdriskuo lobuma organizaceju goda bolvā.

Svātdīņ Rēzeknē nūtyka Boņuka bolvys pasnīgšona. LgSC tyka nūsaukta kai 2008. goda latgalīšu sabīdriskuo organizaceja i dabuoja Boņuku.

Papyldus bolvys dabuoja ari LgSC projekti. Lelais Boņuks i tituls “Lobuokais izdavums / gruomota” tyka pīškierts “Myusdīnu latgalīšu dzejis antalogejai “Susātivs”” , taipat Lelais Boņuks i tituls “Lobuokais pasuokums / projekts” tyka ari Latgalīšu muzykys koncertturnejai „Taiseits Latgolā / Made in Latgola”. Mozī Boņuki tyka dzejis antologejai “Susātivs” par Latgolys vuorda populariziešonu literatūrā i koncerttūris “Taiseits Latgolā” prezentacejis pasuokumim Latvejā kai lobuokajai publicitatis akcejai muzykā.

Tikkū atsagrīžu nu NVO instituta bolvys pasnīgšonys Saulis akminī. Bejom divatā ar Vitu. Par puorsteigumu pošim nu pīsaceituos 2008. goda programmys latgalīšu volūdys aizsardzeibai žureja par lobu inovativu beja atzynuse 3. septembra orienteišonuos saceņseibys.

LgSC vuords pasaruodēja prīškā iz ekrana sūpluok vēļ 4 nominantim – lobuokuo 2008. goda inovaceja. Až sirds īsatreisēja. 🙂 Beja komentars par y nūsaukumā, tok tai lobdabeigai. Kai atškireibys zeime. Izaruod, ari tai var īkrist kaidam acī.

Tai ka prīca par padareitū, prīca par padareituo publisku atzeišonu, tok niu laiks jaunim dorbim i sasnīgumim. Kab 2008. godā padareitais byutu vīns sūleits i trepu pakuopīņs i 2009. gods paītu jau tuoļuok ar jaunu sūli i jaunu pakuopīni.

Paļdis Jiusim vysim par trokumu, atbolstu i par skrīšonu!

P. S. Par Boņuka bolvu i cytu storpār ari par LgSC – šudiņdīnys “Kulturys Foruma” pyrmajā lopā. 🙂

Ilze