Portals lakuga.lv pīduovoj jaunu raidīrokstu latgaliski “Mīti”
Nu 19. februara pīcys trešdīnis piec kuortys straumiešonys platformuos “Spotify”, “Apple Podcasts” i “YouTube” tiks publicātys jauna raidīroksta latgaliski “Mīti” serejis. Raidīrokstu veidoj latgalīšu kulturys ziņu portals lakuga.lv, bet jū finansej Medeju atbolsta fonds nu Latvejis vaļsts budžeta leidzekļu. Pīcuos raidīroksta serejuos tiks runuots par temom ap muzyku, medejim, volūdu, teatri i latgaliskū.
Raidīrokstam dūts nūsaukums “Mīti” deļtuo, ka vaci stereotipi viestej, ka latgalīši nikai navar koč kū atrysynuot bez mītu. Izavācynoj i vyss skaidrys. Puorlykumā nu latvīšu literaruos volūdys latgaliski itys vuords nūzeimoj “mieti”. Itymā raidīrokstā portala lakuga.lv žurnaliste Edeite Laime i redaktore Laura Melne raudzeis apguozt mītus, runojūt par pīcim vysaidim mitim (latvīšu literarajā volūdā “mīti”) ap Latgolu i latgaliskū. Bet, kab mitus apguoztu kai mītus, vajag sasatikt i sasarunuot. Ka gribīs viertīs storptautyskuok, tod byus ari tys “mīt”, kas angļu volūdā – sasatikt!
Pyrmū raidīroksta epizodi “Voi muzykys latgaliski radeju stacejuos ir par moz?”, kurā pīsadola apvīneibys “Latgalīšu reps” dalinīki Ivo Grigalis i Didzis Kozlovs, tautā cīši īmeiļuots muzykants, aktivs redzīņa izsaceituojs Jurs Ostrovskis i Latvejis Radejis 2 golvonais muzykys redaktors, radejis personeiba Roberts Buivids, jau var nūsaklauseit straumiešonys platformuos.
Ūtrajā epizodē “Voi Latgolys medeji par daudzi runoj ap “skaistū Latgolu”, bet izavaira nu problemu analitiskys apsavieršonys?” pīsadaleis žurnaliste i aktiviste Anželika Litvinoviča, Latvejis Radejis Latgolys studejis vadeituoja Renāte Lazdiņa, kai ari žurnaliste Inga Kaļva-Miņina. Trešajā epizodē grupys “Borowa Mc” solists Aigars Runčis, literats i ari multimuokslinīks Raibīs aba Oskars Orlovs, kai ari volūdneica, Vaļsts volūdys centra lingviste Muora Mortuzāne-Muravska diskutēs par tū, voi vīgļuok byut latgalīšu muzikam, na literatam, kam tev napuormat par pareizraksteibu. Tok catūrtajā epizodē, par tū, voi latgaliski teatrī vysulobuok īstudēt komedeju, apsprīss teatra i kinys režisors, Dailis teatra muokslinīcyskais vadeituojs Vīsturs Kairišs, režisors, kurs pyrmais Nacionalajā teatrī īstudiejs izruodi latgaliski “Latgola.lv”, Valdis Lūriņš, kai ari teatra pietneica i kritike Kitija Balcare. Raidīroksts nūsaslēgs ar epizodi “Voi Latgolā vysam juonūteik latgaliski?”, kurā pīsadaleis Namaterialuo kulturys montuojuma centra “Upīte” direktors Andris Slišāns, Latgolys viestnīceibys “Gors” muokslinīcyskuo vadeituoja Ilona Rupaine i režisore nu Ludzys Marika Čerņavska.
“Raidīroksta mierkis ir pīduovuot jaunu veidu, kai styprynuot i atteisteit izpratni i zynuošonys par Latgolys kulturtelpu, nūtikšonom tamā, muzyku, teatri, medeju vidi i cytim aktualim aspektim, veidojūt sabīdriski nūzeimeigu, izgleitojūšu, kai ari kritiskū dūmuošonu atteistūšu audio saturu portalā lakuga.lv. Raidīroksti byus interesanti i tim, kas nav īroduši, cik daudz skaiteit latgaliski, i tim, kas lobpruot patierej saturu audio formatā,” tai projekta vadeituoja Amanda Anusāne.
Raidīroksta projekta vadeituoja ir latgalīšu kulturys ziņu portala lakuga.lv vadeituoja Amanda Anusāne, bet epizožu redaktoris i vadeituojis ir portala redaktore Laura Melne i žurnaliste Edeite Laime. Džinglus sagataveja “Funky Town Studio”, kurūs studejā tyka īraksteitys ari treis raidīroksta epizodis, sovpus divejis epizodis īraksteitys Latvejis Radejis Latgolys studejā. “Mītu” vizualū identitati izstruoduoja Liāna Merņaka.
