Seminara “Atzolys” jaunīši īrakstejuši raidīroksta “Pīci breinumi” epizodi par dzeivi laukūs i piļsātā
Nu 6. da 9. augusta Kruoslovys nūvoda Dagdys vydsškolā nūtyka latgaliskais seminars jaunīšim “Atzolys”. Seminara pādejā dīnā jaunīši kūpā ar Latvejis Radejis Latgolys multimedeju studejis raidīroksta “Pīci breinumi” komandu, kas jaunīšim paleidzēja saprast, kai tūp raidīroksti, kas juojem vārā dorbā medejūs, kai ari vysu kūpā īraksteja vīnu “Pīci breinumi” epizodi.
Seminara “Atzolys” (vaira par seminaru ITE) pādejā dīnā jaunīšim beja vareiba pīsadaleit rodūšajā darbneicā ar Latvejis Radejis Latgolys multimedeju studejis raidīroksta “Pīci breinumi” komandys puorstuovem Amandu Anusāni i Daigu Laizāni, lai vaira izzynuotu par medeju dorbu i poši praktiski radeitu vīnu raidīroksta sereju. Darbneicys pyrmajā daļā radejis puorstuovis izstuosteja teoreju par raidejuma taiseišonu, bet ūtrajā daļā jaunīši sasadaleja komanduos, dūmuoja sev aktualys i svareigys temys, par kū varātu byut raidejums, taiseja juo scenareju. Golā tyka izalaseita lobuokuo tema raidejuma īrokstam.
Raidīroksta “Pīci breinumi” specialuo izlaiduma sereja topa par dzeivi laukūs i piļsātā. Sarunu vadeja Marija Skangale i Jurs Vaņkovs, bet sarunā pīsadaleja Lauma Pučeite, Ieva Folkmane i Margita Borisova. Īrokstu var nūsaklauseit ite:
Seminara nūtikšonu finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, kai ari Latgolys kulturys programa, kurū eistynoj Latgolys regiona atteisteibys agentura ar Vaļsts kulturkapitala fonda mierkprogramys “Latviešu vēsturisko zemju attīstības programma” atbolstu. Seminara catūrtū dīnu i nūdarbeibys par medejim i medejprateibu atbaļsteja Baļtejis Medeju izcileibys centrys caur “TechSoup Global” teiklys, platforma “Hive Mind” i “Google.org” grantu. Seminara reikuotuojs – latgalīšu kulturys kusteiba “Volūda” (bīdreiba “LgSC”).
