Aicynojam bolsuot par lobuokū fotokonkursa “PieZīmes/PīZeimis/JūrõTǟtõkst” dorbu
Latgalīšu kulturys kusteiba “Volūda”, Latvejis Nacionalais kulturys centrs i Latvejis Universitatis (LU) Lībīšu instituts julī izsludynuoja fotokonkursu “PieZīmes/PīZeimis/JūrõTǟtõkst”, kurā interesenti, apceļojūt Latveju, tyka aicynuoti īmyužynuot jaunuos latvīšu viesturyskūs zemu rūbežu i latgalīšu rokstu i lībīšu volūdā izlyktuos vītvuordu zeimis. Dorbus vairuokuos kategorejuos varēja īsyuteit da 30. septembra. Dorbus vērtēs kai konkursa reikuotuoju žureja, tai niu ir suocīs ari publikys simpatejis bolvys bolsuojums latgalīšu kulturys ziņu portala lakuga.lv profilā socialajā teiklā “Facebook”.
Fotokonkursā, kura mierkis ir popularizēt latvīšu viesturyskuos zemis i seviški latgalīšu rokstu volūdā i lībīšu volūdā pastateitūs apdzeivuotūs vītu nūsaukumus, kai ari izgleituot sabīdreibu par lībīšu kai Latvejis pamatīdzeivuotuoju volūdu i latvīšu volūdys byušonu vysaidai car latgalīšu rokstu volūdu, da 30. septembra varēja ī muokslys foto, pašeišus, fotokolažys, taipat atzineibu dabuos ari daleibnīki, kas varēs īmyužynuot vysuvaira nūruožu. Gondreiž 30 dalinīki 64 kadrūs īmyužynuojuši 47 nūsaukumus – vītvuordu nūruodis i cytus uzrokstus, zeimis. Nu vysu nūruožu 13 beja lībiski i 19 latgaliski raksteituos vītvuordu nūruodis, bet 15 cytys zeimis/uzroksti/nūruodis latgaliski. Vysa popularuokuos nūruodis (pasaruodejušys vysu vaira biļdēs): Mazirbe/Irē (5 biļdēs), Kolka/Kūolka i Varakļāni/Varakļuoni (kotra pa 3 biļdem). Vaira par fotokonkursa nūsacejumim ITE.
Konkursa uzvarātuoji tiks nūskaidruoti žurejis viertejumā i publikys simpateju bolsuojumā, kas suocīs i da 13. oktobra byus latgalīšu kulturys ziņu portala lakuga.lv kontā ITE, taipat tiks gūdynuots konkursa dalinīks, kas īmyužynuojs vysu vaira vītvuordu nūruožu. Golvonūs bolvu sajiemieji byus zynomi 15. oktobrī, kod teik sveiteita Vaļsts volūdys dīna. Kotrys uzvarātuojs sajims konkursa reikuotuoju saryupātys duovonys – viesturyskajuos zemēs radeitus gordumus, izdavumus i cytus lobumus.
Fotokonkursa nūsaukumā “PīZeimis/PieZīmes/JūrõTǟtõkst” simboliski sasavyn vuordi “piezīmes” i “pie zīmes” (latgaliski “pīzeimis” i “pī zeimis” (pī – Zīmeļlatgolys izlūksnēs), lībiski – “pīzeimis”), aicynojūt konkursa daleibnīkus fotografētīs pošim i rodūši izapaust, īmyužynojūt latvīšu viesturyskūs zemu rūbežu i vītvuordu nūruodis. Latvīšu viesturyskūs zemu rūbežu i apdzeivuotūs vītu nūruodis lībīšu i latgalīšu rokstu volūdā atbiļstūši Latvīšu viesturyskūs zemu lykumā nūsaceitajam gar vaļsts autocelim suoce pastateit pārnejuo gods rudinī. Pastateituos zeimis sabīdreibā sajāmušys kai prīcu i atbolstu, tai naizpratni i nūraidūšu atsatīkšonu par zeimu vītu i jamuos paruodeitajom volūdom. Aiz tuo fotokonkursa reikuotuoji tur nūceju, ka itaids aicynuojums dagrīzs sabīdreibys viereibu zeimem i reizē rūsynuos izzynuot Latvejis namaterialū kulturys montuojumu, vītejūs dzeivuotuoju volūdu i Latvejis identitatis elementus. Kai daudzi jau īvāruojuši, niu ir vaļsts leluokūs ceļu ir pastateitys vaira nakai 50 viesturyskūs zemu rūbežu nūruodis (Latgale, Zemgale, Kurzeme, Vidzeme, Sēlija), kai ari vaira nakai 300 vītvuordu nūruodis latgalīšu rokstu volūdā Latgolā i vaira nakai 30 – Lībīšu krostā lībīšu volūdā.
Fotogalerejā: fotokonkursa daleibnīku īsyuteitī dorbi
Īmyužynuot latvīšu viesturyskūs zemu rūbežu i vītvuordu nūruodis latgaliski i lībiski aicynuoja fotokonkursa reikuotuoji – latgalīšu kulturys kusteiba “Volūda”, Latvejis Nacionalais kulturys centrs, LU Lībīšu instituts, kai ari atbaļsteituoji Latgolys turisma asociaceja i latgalīšu kulturys ziņu portals lakuga.lv. Aktivitati finansiali atbolsta Sabīdreibys integracejis fonds nu Latvejis vaļsts budžeta daškiertūs Kulturys ministrejis leidzekļu projektā “Latgaliskuos kulturvidis styprynuošona: sadarbeiba, izpratne i īsaiste”.
