Seminarā “Atzolys” jaunīši izzynuot latgalīšu volūdu, kulturu i Dagdys apleicīnis kulturys vierteibys

Jaunnedeļ, nu 6. da 9. augusta, Dagdā byus latgaliskais seminars jaunīšim “Atzolys”, kurā vaira nakai 20 jaunīšu nu Latgolys i cytu vītu lekcejuos, rodūšajuos nūdarbeibuos i ekskursejuos izzynuos latgalīšu volūdu i kulturu. Pyrmū reizi latgaliskais seminars jaunīšim nūtyka 2004. godā Ludzys nūvoda Kuorsovā, i itūgod “Atzolys” svietej 20 godu pastuoviešonu. “Atzolys” ir bejs kai atspierīņa punkts ari daudzim ituos šaļts latgaliskajā kulturtelpā zynomim aktivistim vaira izzynuot i īsasaisteit latgaliskuos kulturys i regiona sabīdryskajūs procesūs.

Dagdā paradzātajā latgaliskajā seminarā “Atzolys” pīsadaleis vaira par 20 jaunīšu 16 da 22 godu vacumā ar interesi vuiceitīs latgalīšu rokstu volūdu, runuot latgaliski, īpazeit latgaliskū kulturu i vierteibys, lai styprynuotu sovu identitati, byutu zynūši par procesim, nūtikšonom i personeibom Latgolā i latgaliskajā kulturā, iz prīšku poši vaira īsasaisteitu piļsūniskuos sabīdreibys veiduošonā, kai ari socializātūs, veiduotu jaunus kontaktus, stureigi pavadeitu laiku, īsadvesmuotu i vaira izzynuotu Dagdu, tuos apleicīni i aktivūs dareituojus.

Ituo gods seminarā pīsadaleis 24 jaunīši nu Bolvu, Ludzys, Kruoslovys, Preiļu Rēzeknis, Varakļuonu nūvodu, Rēzeknis i Daugovpiļs vaļstspiļsātu, kai i nu Līpuojis, Reigys i Nederlandis. Seminara nūtikšonai Dagda izalaseita, pasateicūt vītejuo jaunīša Linarda Kalniņa aicynuojumam, kas izskanēja pārnejuo gods novembrī Leivuonā reikuotajā pasuokumā jaunīšim “Spāka LAB”, ka Dagdā vajagūt vaira latgaliskūs nūtikšonu.

Ar jaunīšim vosorys seminarā struoduos: latgalīšu rokstu volūdys nūdarbeibys vadeis latgalīšu rokstu volūdys specialiste Māra Mortuzāne-Muravska, ap teatri i latgalīšu volūdu nūdarbeibu vadeis akters Juoņs Krūņs, improvizacejis nūdarbeibys vadeis pasuokumu vadeituojs i improvizators Kozmens (Mārtiņš Kozlovskis), ap Latgolu i latgaliskū marketingā stuosteis uzjiemiejs i zeimyna “Latgalactica” radeituojs Raimonds Platacis, raidīrokstu taiseišonys praktiskū darbneicu vadeis jaunīšu raidejuma “Pīci breinumi” komanda, ap Latgolys informativū telpu runuos raidejumu veiduotuoja Vladislava Romanova, ar latgalīšu volūdys lītuošonu i vajadzeibu digitalajūs reikūs īpazeistynuos projekta “Bolsu tolka” puorstuove Kristīne Pokratniece, rodūšuos darbneicys vadeis dizainere Liāna Merņaka-Nikitina, taipat jaunīši gaseis muzejā “Ondrupinis lauku sāta” i Dagdys folklorys centrā izzynuos Latgolys leigovys 19. godu symta pyuru, pīsadaleis orientiešonys spēlē, kai ari paši reikuos debašu i daņču vokorus.

Seminara nūtikšonu finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, kai ari Latgolys kulturys programa, kurū eistynoj Latgolys regiona atteisteibys agentura ar Vaļsts kulturkapitala fonda mierkprogramys “Latviešu vēsturisko zemju attīstības programma” atbolstu. Seminara reikuotuojs – latgalīšu kulturys kusteiba “Volūda” (bīdreiba “LgSC”).