Izdūts Anitys Mileikys dzejis kruojums “ziņas par gadalaikiem”
Latgalīšu kulturys kusteiba “Volūda” (bīdreiba “LgSC”) izdavuse dzejneicys Anitys Mileikys ūtrū dzejis kruojumu “ziņas par gadalaikiem”. Kruojumā publicāti 42 Anitys jaunuokī dzejis dorbi latvīšu literarajā i latgalīšu rokstu volūdā.
“ziņas par gadalaikiem” ir ūtrais Osyunā dzymušuos literatis Anitys Mileikys dzejis kruojums. 2015. godā “LgSC” (tūlaik vēļ “Latgolys Studentu centrs”) izdeve Anitys debeja dzejis kruojumu “mūžīgā nepārtikusī stirna”, kas tyka nomināts Latvejis Literaturys goda balvai (LaLiGaBa) kai vīns nu lobuokūs debejis dorbu literaturā, taipat kruojums sajēme Latgalīšu kulturys goda bolvu “Boņuks 2015” par lobuokū snāgumu literaturā.
Piec pyrmuo dzejis kruojuma izīšonys Anitys dzeja tyka raksturuota kai duala (divejis volūdys kai izasaceišonys leidzejlis), trausla i brutala, namīra, kas pīdzimst kai ba nu mīra, nu nikuo, i mīra, kas pīdzimst nu namīra, pīpiļdeita. Uzrunojūša ar liriskuos varūnis seksualitati, puordzeivuojumim i sīviškeibu, bet reizē autore spiej myužam senejuos temys napīsvaideit ar klišejom i sentimentu (izvylkumi nu literaturzynuotneicys Sandrys Ratniecis, dzejnīka Aivara Eipura i filozofa i publicista Ilmāra Šlāpina viertejumu).
Jaunajā, niu jau ūtrajā, dzejis kruojumā publicāti Anitys Mileikys dzejūli latvīšu literarajā i latgalīšu rokstu volūdā. Kruojuma redaktors ir Oskars Orlovs (Raibīs), bet korektore Māra Mortuzāne-Muravska. Dzejis kruojuma vuoka ilustraceja ir tūpūšuos muokslineicys, Latvejis Muokslys akademejis studentis Lijis Stivrinis speciali radeits dorbs, bet dzejis gruomotys maketu taisejuse dizainere Liāna Merņaka-Nikitina. Kruojuma izdūšonys dorbus dareja Edeite Laime i Kristīne Pokratniece. “ziņas par gadalaikiem” drukuots “Jelgavas Tipogrāfijā”, bet par tuo izdūšonys atbaļsteišonu lels paļdis Ventspiļs Storptautyskajai Rakstnīku i tulkuotuoju sātai i Vaļsts kulturkapitala fondam.
Latgalīšu kulturys kusteibys “Volūda” projektu vadeituoja i kustynuotuoja Kristīne Pokratniece, kura beja Anitys Mileikys pyrmuo dzejis kruojuma projekta vadeituoja i kuru literats Valentins Lukaševičs nūsaucs par Anitys dzejis krystamuoti, par jaunū kruojumu soka: “Anitys dzeja uzrunoj ar dobys tyvumu tamā, ar formu. Patīseibā, kod skaitu juos tekstus, maņ ir sajiuta, ka jei dzeivoj koč kur pi jiurys, vokorūs izīt sapeipātu iz balkona i vāroj “septembra marmelada sauli”, glīmežvuokus i dzeivoj ikdīnišku, bet taipat laikā sīvītis dziļu dzeivi. I vēļ ilgys. Skaiteju jaunuokū kruojumu i redzieju tī lelys ilgys.”
Īsavērt Anitys Mileikys jaunajā dzejis kruojumā pīduovuos ari augusta/septembra literaturys, publicistikys i viesturis žurnals “Domuzīme”, bet gruomotys prezentacejis nūtikšonys paradzātys ituo gods rudinī. Taipat daļa kruojuma tiražys tiks nūdūta Latvejis Nacionalajā bibliotekā, lai piečuok tys byutu daīmams piec īspiejis vaira bibliotekuos regionūs. Dzejis kruojums byus daīmams ari latgalīšu kulturys kusteibys “Volūda” atbolsta platformā-veikalā voluda.lv i leluokajuos gruomatneicuos Latvejā.
Vaira par autori Anitu Mileiku var puorskaiteit ITE.
