Tiks izdūts Ilzis Spergys dzejis kruojums “Rudiņa bolsi”

Tiks izdūts Ilzis Spergys dzejis kruojums “Rudiņa bolsi”

2021. gods golā izdūšonu pīdzeivuos vīnys nu spylgtuokūs myusu laiku latgalīšu literaturys autoru – Ilzis Spergys – dzejis kruojums “Rudiņa bolsi”. Dzejis kruojumā apkūpuoti vaira nakai 120 autoris dzejūļu, kas saraksteiti laika periodā nu 2000. da 2016. goda.

Ilze Sperga ir rakstneica, publiciste i filologejis doktore, stuostu kruojuma “Dzeiveiba”, bārnu gruomotys “Munā sātā” i bārnu dzejūļu kruojuma “Vuškeņa iz pļovys” autore. Par sovim literarajim dorbim i publikacejom sajāmuse septenis Latgalīšu kulturys goda bolvys “Boņuks”. Kruojums “Dzeiveiba” bejs nomināts Latvejis Literaturys goda bolvai 2015, itūgod stuosti nu tuo izskanēja pyrmajūs radejis lasejumūs latgaliski. Dzejis kruojumā “Rudiņa bolsi” apkūpuoti lobuokī padsmit godu laikā nu apmāram 2000. da 2016. goda raksteitī dzejūli, kas leidz šam publiski skaiteiti viņ literarūs pasuokumūs: Upītis uobeļduorzā, Andrejdīnā, Dzejis dīnu pasuokumūs dažaiduos Latvejis vītuos (Reigā, Rēzeknē, Cēsīs, Lelvuordē, Gaļānūs i c.), publicāti latgalīšu dzejis antologejā “Susātivs”, dzejis diskā “Inflatio Poesis” i dīnrokstā naktineica.lv. Dzejūli nu gara dzeivis perioda, par dažaidom temom.

Par “Rudiņa bolsim” poša Ilze soka: “Leidz šam Ilze Sperga ir bejuse dzejneica bez dzejūļu kruojuma. Niu maņ ir kruojums, bet es vaira naasu dzejneica, partū ka rokstu puorsvorā prozu. Leidza ar tū kruojums ir kai kaida perioda tekstu apkūpuojums – tūs, kas leidz šam izskaniejuši mutvuordūs, publicāti fragmentari, pamatā periodikā i škārsteiklā.”

Dzejis kruojuma “Rudiņa bolsi” redaktore ir dzejneica Anna Rancāne, muokslinīks-maketātuojs Verners Timoško, bet kruojuma izdeviejs – bīdreiba “LgSC”. Kruojuma izdūšonu atbaļstejuse Latgolys kulturys programa, kurū eistynoj Vaļsts kulturkapitala fonds i Latgolys regiona atteisteibys agentura ar a/s “Latvijas valsts meži” atbolstu.

Pastuosti cytim!

Leave a Reply

Your email address will not be published. Required fields are marked *