Vaļdis sēde, diskusejis, plani i rezultati

31. janvarī LgSC Reigys birojā sasatyka jaunuo 2012. goda LgSC vaļde. Sēdis laikā tyka īvālāts jaunuos vaļdis prīšksādātuojs, juo vītnīks, sadaleiti puorejī dorba pīnuokumi, kai ari apsprīsti cyti svareigi ar LgSC darbeibu saisteiti vaicuojumi.

Kai jau zynoms, bīdru kūpsapuļcis laikā Rēzeknē tyka īvālāta jaunuo LgSC vaļde: Ilze Bojāre, Dagneja Bramane, Vineta Vilcāne, Juoņs Papeņš i Raitis Tučs. Aktivi diskutejūt par LgSC vaļdis prīšksādātuoja pīnuokumim, dorba specifiku i izvierzeitū kandidatu redziejumu par sovu īguļdejumu, pyldūt itū pīnuokumu, aizkluotā bolsuojumā par prīšksādātuoju tyka īvālāts leidzšinejais LgSC vadeituojs Raitis Tučs, bet juo vītnīka pīnuokumus piļdeis Dagneja Bramane.

Taipat tyka sadaleiti pīnuokumi puorejim vaļdis lūceklim: pi atteisteibys projektim struoduos Vineta, par īkšejū komunikaceju atbiļdēs Dagneja i Ilze, bet par publiskajom attīceibom – Juoņs i Vineta.

Sēdis laikā par Reigys biroja vadeituoju tyka apstyprynuota Kristīne Prokratniece, planavuots, ka dreiž Reigys birojs puorsaceļ iz jaunom telpom (piečuok byus precizuoka informaceja). Rēzeknis biroja vadeituoja pīnuokumus turpynoj piļdeit Diāna Miščenko, bet Daugpilī ‒ Zaiga Lāce.

Kai vīna nu 2012. goda LgSC prioritatem teik izvierzeita sadarbeibys i komunikacejis veicynuošona bīdreibys īkšīnē i informacejis snīgšona iz uoru.

Sēdis laikā vēļ tyka apskateiti vaicuojumi par sadarbeibys partnerim, idejis projektim i pasuokumu plans 2012. godam. Lai vysus mierķus veiksmeigi sasnīgtu, vaļde apsajāmuse ceņteigai struoduot i īsaisteit puorejūs bīdrus gon pasuokumu organiziešonā, gon projektu raksteišonā i realiziešonā, kai ari lobpruot uzklauseitu bīdru i cytu interesentu īsacejumus veiksmeigai LgSC darbeibai jaunajā dorba cielīnī.

Teikamēs pavysam dreiž cytuos sapuļcēs, diskusejuos, pasuokumūs i kasdīnā!

 

Ar sveicīni,

LgSC vaļde

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.