Rss Feed Tweeter button Facebook button Youtube button
Latgolys Studentu centrs
Par LgSC dzeivi i sadzeivi
Sorkonboltsorkonuos kruosys lai zīd!

Kab rūsynuotu školānus i studentus par Latveju i tāvu zemis mīlesteibu dūmuot, runuot i raksteit latgaliski, bīdreiba „Latgolys Studentu centrs” izsludynoj patriotisku rodūšūs dorbu konkursu „Sorkonboltsorkonuos kruosys lai zīd!”. Konkursā aicynuoti pīsadaleit bārni i jaunīši leidz 30 godu vacumam.

Bārni i jaunīši aicynuoti konkursam īsyuteit dzejūli, stuostu voi eseju latgalīšu rokstu volūdā par tū, kai jī izjiut latgaliskū Latveju, kū par tū dūmoj, kaidus sapynus ar tū saista.

Konkursa dorbi leidz ituo goda 4. novembram ar nūruodi „Konkursam „Sorkonboltsorkonuos kruosys lai zīd!”” juosyuta voi nu elektroniski iz e-posta adresi: lgsc@lgsc.lv, voi ari pa postu iz adresi: LgSC birojs, Antonejis ūļneica 8-3/6, Reiga, LV-1010.

Konkursa 1. i 2. vītys īgivieji kotrs bolvā sajims divejus īlyugumus iz 20. novembra Latvejis Nacionaluo teatra izruodi „Latgola.lv” i īspieju izavieleit duovonys bīdreibys „Latgolys Studentu centrs” CD i gruomotu goldā attīceigi Ls 20 i Ls 15 vierteibā. Eipaša bolva paradzāta ari tam školuotuojam, kurs vysu aktivuok aicynuos bārnus i jaunīšus pīsadaleit konkursā. Školuotuojs sajims īspieju izavieleit duovonys bīdreibys „Latgolys Studentu centrs” CD i gruomotu goldā Ls 10 vierteibā.

Īsyuteitajam dorbam juobyut latgalīšu rokstu volūdā. Autoram, kura dorbā byus vysmozuok pareizraksteibys klaidu, LgSC duovynuos puorsteiguma bolvu.

Konkursa nūlykums i Latgalīšu volūdys pareizraksteibys nūsacejumi atrūnami bīdreibys „Latgolys Studentu centrs” interneta sātys lopā http://lgsc.lv.

Konkursa rezultati tiks publiceiti bīdreibys „Latgolys Studentu centrs” interneta sātys lopā piec ituo gods 11. novembra, a lobuokī konkursam atsyuteitī dorbi – portalā „LaKuGa.lv” – piec 18. novembra.

Konkursu organizej bīdreiba „Latgolys Studentu centrs”. Konkurss veļteits Latvejis Republikys proklamiešonys 93. goda dīnai. Juo mierkis ir akcenteit latvyski latgaliskū identitati i paruodeit latgaliskū kai sovpateigu i vierteigu latvyskuos kulturys daļu.

Nūlykums: LgSC_konkurss_sorkonbolts_nulykums

Pastuosti cytim!

Leidzeigī roksti:

Leave a Reply