Seminars “Roksti!” aizvadeits

Latgalīšu entuziasti nu 26. leidz 29. juļam Škilbanu pogosta Balkanūs tykuos seminarā „Roksti!”, lai apgiutu latgalīšu rokstu volūdys pamatus, izzynuotu vaira par žurnalistiku i pavadeitu laiku latgaliskā gaisūtnē. Vosorys školu reikuoja bīdreiba „Latgolys Studentu centrs” i Latgalīšu Kulturys Gazeta (LaKuGa) ar LR Kulturys ministrejis i Vaļsts kulturkapitala fonda Latgolys kulturys programmys atbolstu.

Vosorys školys golvonais mierkis beja veicynuot latgalīšu rokstu volūdys apgiušonu i lītuošonu kasdīnā, kai ari seminara dalinīkus īsaisteit turpmuokā LaKuGys satura veiduošonā. Kai izaruodeja, latgalīšu rokstu volūdys nūsacejumi ir dīzgon sarežgeiti i tū apgiušona prosa pacīteibu i laiku. Rokstu volūdys nūdarbeibu vadeituojai Muorai Mortuzānei-Muravskai vīgli uztveramā veidā īsadeve golvonūs pamatus izstuosteit, tūmār daudz vēļ pošim seminara dalinīkim byus juoapgiust patstuoveigi. Bez zynuošonom rokstu volūdā seminara dalinīkim beja arī īspieja īgiut zynuošonys rokstu veiduošonā i foto reportažu sagataveišonā. Praktiskus padūmus veiskmeiga roksta sagataveišonā deve Anita Brauna (žurnals „IR”), sovukuort Gunārs Vilcāns (Latgolys forografu bīdreiba) pastuosteja par veiksmeigys foto reportažys sagataveišonu.

Seminara dalinīkim nakluotīnē beja īspieja īpazeit divus izcilus Škilbanu pogosta kulturys darbinīkus, kuri ar sovu darbeibu ir īguojušs Latgolys kulturys viesturē. Bolvu Centraluos bibliotekys direktore Ruta Cibule stuosteja par Mikeli Bukšu (1912–1977) i juo Latgolai veļteitū dorbu trimdā. Sovukuort Māreite Slišāne stuosteja par folklorys vuocieju, rakstnīku i spylgtū personeibu Ontonu Slišānu (1948–2010).

Bez praktiskajom nūdarbeibom i lekcejom seminara dalinīki īpazyna Škilbanu pogosta viesturi, dobys boguoteibys i uzjiemeigus vītejūs īdzeivuotuojus. Izbraukuma laikā tyka apmaklāta Styglovys dobys taka, pabyuts pi izcyluo latgalīša M. Bukša pīminekļa, satykti myusu dīnu aktivi Škilbanu pogosta kulturys cylvāki i pabyuts zemnīku saimnīceibā „Kotiņi”, i kuortejū reizi giuts apstyprynuojums latgalīšu uzjiemeibai i dorba mīlesteibai.

Piec aktivuo dīnys dorba vokorūs Balkanūs pi seminara dalinīkim gasteja vītejī muzykanti i teatris. Pyrmajā vokorā nūtyka sasadzīduošona ar folklorys kūpu „Rekavas dzintars”, nuokamajā dīnā gasteja Baļtinovys amaterteatris „Palādas” ar fragmentu nu izruodis „Ontons i Anne”. Pādejā vokorā par dzīsmem i dančim guoduoja Upeitis jaunīšu folklorys kūpa i vītejuo grupa „Napruots”.

Seminara organizatori soka lelu paļdis dalinīkim, lektorim, vokoru gostim i atbaļsteituojim („Bolvu maiznīkam”, „Adugam” i „Latgolys pīnam”).

Vaira obrazeņu nu pasuokuma verīs ite

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.