Rēzeknē atkluos fotoizstuodi “Myusu Latveja”
Jau 9. decembrī 13.00 Rēzeknis Augstškolys muokslys i sporta terasē bīdreiba “Latgolys Studentu centrs” (LgSC) aicynoj iz ceļojūšuos fotoizstuodis “Myusu Latveja” atkluošonu.
Latvejai i bīdreibai “Latgolys Studentu centrs” novembris ir svātku mieness. Taišni partū tyka reikuots fotokonkurss amaterim “Myusu Latveja”. Pīsadaleit konkursā tyka aicynuoti LgSC bīdri, aktivisti, draugi, kai ari cyti interesenti.
Tai kai LgSC itūgod atzeimuoja sovu 10 pastuoviešonys godu jubileju, kai ari tyvojās Latvejis vaļsts symtgade, konkursam tyka izvālāta patriotiska tema. Konkurss tyka reikuots ar mierki aicynuot dalinīkus daleitīs īspaidūs par 10 godu laikā radzātū, dzierdātū, sajustū i padareitū, kai ari atlaseit i īsyuteit kartenis, kurymuos tys teik atspīgeļuots vyslobuok.
Daleibai konkursā kūpā tyka īsyuteitys 40 kartenis, kurymuos paruodeits kotra autora personeigais redzīņs par sev i Latvejai svareigom šaļtim. Kotra īsyuteituo karteņa ir naatkuortojams i nūzeimeigs stuosts Latvejai.
Ceļojūšajā izstuodē, kuruos pyrmuo pīturvīta ir Rēzeknis Augstškolā, byus apsaveramys 15 kartenis, kas vysspylgtuok atspīgeļoj latvīšu nacionaluos pošapzinis boguoteibys i izjiutys. Sovukuort vysys konkursam īsyuteituos kartenis byus apsaveramys LgSC sātyslopā i LaKuGā.
Izstuode Rēzeknē teik reikuota sadarbeibā ar bīdreibu “Rēzeknes Augstskolas absolventu asociācija”. Izstuode byus apsaverama da 8. janvara.
Kartenis autore: Edeite Husare