Piec kūpsapuļcis

Vasali!

Kūpsapuļce paguojuse i dalykts punkts īprīkšejam godam ar vysim dorbim i nadorbim, veiksmem i nabyušonom, padareitū i atlyktū. Niu laiks jaunam dorba cielīņam. Kab jū īsuoktu, eisi par padareitū i LgSC niu.
LgSC niu ir 59 bīdri, nu tim 38 bolstīseigi i vaira voi mozuok pīsadola bīdreibys dzeivē. Iz kūpsapuļci beja īsaroduši 23 bīdri, leidza ar tū jei beja lemttīseiga.

Svareiguokī kūpsapuļcis lāmumi:
tyka apstyprynuots 2009. goda puorskots i īvālāta jauna vaļde.

Lai ari niu Latvejā ir gryuts laiks i paguojušā godā cīši reši izadevs nu jauna pīsaisteit leidzekļus LgSC projektim, īmesļa vaideišonai eisti nav. Projekti teik raksteiti, idejis dzymst, tok acimredzejūt vaira viereibys juodagrīž bīdru apvuiceibai, kab projektu pīsacejumi saītu konkurēt spiejeiguoki. Lobys idejis bīži tai ari nagiust atbolstu konkursūs, reizem palīkūt tiuleņ aiz streipis.

Atbolstu givušī projekti:
jaunīšu seminars “Atzolys” (KKF, projekta vadeituoja Linda Orole),
zīmys školys Sibirī projekts „Krasnojarskas apgabala latvieši: valodas un kultūrvēstures izpēte, kultūrvides attīstības veicināšana (III)” (KKF, projekta vadeituoja Lideja Leikuma),
sibirīšu braucīņs iz Latveju „Pasākumu kopa – Ceļš uz mājām” (KKF, projekta vadeituoja Kristīne Zute),
Vitys Briškys rodūšais braucīņs iz Sibiri (KKF),
latgalīšu bazneickunga Aigara Bernāna 3 braucīni iz Sibiri„Latgaliskās apziņas veicināšana Krievijas Federācijas latgaliešu diasporā” (LRAA, projekta vadeituoja Ilona Zaiceva),
gruomotys izdūšonys projekts „Latgaliešu pasaku izlases “Tu soki. Es soku. Puosokys par krīzi” izdošana” (KKF, projekta vadeituoja Marita Papiņa).

Puorsteidz, ka nu tim daudzajim īsnīgtajim i nabyut na švakajim projektim gondreiž vysi, kas givuši atbolstu, ir saisteiti ar Sibiri – pietnīceibu, kulturvidis kūpšonu, sibirīšu gasteišonu Latvejā. Acimredzejūt naudys deviejim latgaliskuma kūpšona, izpiete Sibirī ruodīs aktuala vajadzeiba i LgSC jī redz īspieju jū apmīrynuot, piļdeit.

Nasaverūt iz vysu, 2009. godā LgSC dorbuojuos na tikai Sibirī. Ari itepat Latvejā voi dreižuok – taišni Latvejā ir daudz vajadzeibu i īspieju latgaliskom aktivitatem, dorbim i pasuokumim.

Svareiguokī 2009. goda aizdavumi:
eistynuot projektus, kas veicynoj latgalīšu kulturys atteisteibu, atpazeistameibu sabīdreibā i seviški jaunīšu vydā;
pīsaisteit jaunus bīdrus, kai ari daleibnīkus i apmaklātuojus LgSC organizeitajim pasuocīnim;
sasadorbuot ar medejim i snīgt informaceju par LgSC padareitajim dorbim;
regulari informēt bīdrus par vaļdis lāmumim i cytom bīdreibys aktivitatem, pasuocīnim;
nūstyprynuot organizacejis darbeibu ar stabilu finansiejumu;
atteisteit regionalūs biroju darbeibu i īsaisteit LgSC darbeibā vairuoku augstškolu studentus.

Cerīs, ka bīdru i sabīdreibys informeišona ir palykuse lobuoka – informaceja par svareiguokajim pasuokumim teik izsyuteita medejim, presis relizis giust īviereibu, informaceja pasaruoda i portalūs, i avīzēs.
Ir sataiseits itys dīnroksts, tvitera konts, LgSC lopa portalā draugiem.lv. Kai ari teik izsyuteiti e-posti ar byutiskuokū informaceju.
Regionalī biroji nav spiejuši pīsaisteit jaunus bīdrus, laikā nu pādejuos kūpsapuļcis februarī īsastuojs tik 1 jauns bīdrs. Niu Rēzeknē i Reigā struodoj jaunys biroja vadeituojis: Anna i Edeite. Ari Daugovpilī teik maklāts jauns biroja vadeituojs.

Svareiguokī 2009. goda projekti:
Literari muzykalūs pasuokumu cikls LaLaDra Daugovpilī, Reigā i Rēzeknē
Koncertu cikls “Taiseits Latgolā”
Sātyslopys lakuga.lv uztureišona
Latgalīšu rokstu volūdys kursi (03-06)
Bārnu i jaunīšu rodūšūs dorbu konkurss
Leluo tolka Dagdā (04)
Seminars par gūdu latgalīšu drukys aizlīguma atceļšonys 105. godadīnai (05)
Autoru nakts “Tievanānu pavasars” (05)
Latgolys dīna Breivdobys muzejā (05)
Latgaliskuos apzinis veicynuošona Krīvejis Federacejis latgalīšu diasporā (05-12)
Leigū svieteišona Bukmuižā (06)
Jaunīšu seminars “Atzolys” Preiļūs (08)
Nūvodu dzejis dīna Breivdobys muzejā (09)
Studentu orienteišonuos saceņseibys (09)
Jaunūs autoru skaitiejumi “Tehnodzeja” (09)
Peintbola turnirs (10)
Bārnu stuostu konkurss (11-12)
Čyguonūs īšona Aglyunā (12)
Puosoku gruomotys sastateišona

Kūpsapuļcē tyka apsprīsti ari LgSC plani iz prīšku.
Svareiguokuos tendencis – bīdru leidzdaleiba na tikai reizi godā vaļdis vieleišonuos, a ari izsokūt vīdūkli par svareiguokajim vaicuojumim i pīsadolūt aktivi bīdreibys darbeibā ar sovom idejom i dorbu. Partū ka taišni bīdri nūsoka i akceptej bīdreibys vierzeibu, na nazkas nu molys voi augšys.
Taipat tyka izsaceita vajadzeiba piec lobuokys sadarbeibys ar cytom leidzeigom Latvejis i uorvalstu bīdreibom, kas veicynuotu īspiejis padareit vaira i kvalitativuok.
Rezumejūt – kotram bīdram i latgalīšu studentam ir juobyut īspiejai zam LgSC kai juridiskys organizacejis jumta atrast vītu sovom latgaliskajom aktivitatem, kas atbylst LgSC statutim i namaitoj juo vuordu.

Tyka īvālāta jauna bīdreibys vaļde. Vaļdē ir 5 lūcekli: Anna Briška, Vita Briška, Vineta Grigāne, Muora Mortuzāne, Ilze Sperga.
Par LgSC vaļdis prīšksādātuoju vaļde īvēlēja Ilzi Spergu, par juos vītneicu – Vinetu Grigāni.

Svareiguokī aizdavumi iz prīšku:
izveiduot LgSC atteisteibys vizeju, strategeju i mierķus, izstruoduot koncepceju jūs sasnīgšonai;
veicynuot bīdru sadarbeibu, sasapazeišonu i kūpeigu dorbu dareišonu;
padareit LgSC saistūšu jaunajim studentim, īpazeistynuot jaunīšus ar bīdreibys sasnīgtū i pīsaisteit jaunim dorbim, idejom;
vaira sasadorbuot ar leidzeigom NVO Latvejā i uorvaļstīs kūpeigu mierķu sasnīgšonai;
nūturēt i paceļt latgaliskūs aktivitašu i pasuokumu kvalitati;
saglobuot veiksmeigūs darbeibys vierzīņus i asūšū projektus, meklēt jaunus;
meklēt stabilus sadarbeibys partnerus i ari sevi veiduot kai stabilu partneri;
sasadorbuot ar augstškolom i studentu pošpuorvaļdem;
definēt LgSC politiskū nūstuoju, apolitiskumu;
meklēt jaunys īspiejis, jaunus ceļus i nasabeit rūbežu.

Kas tuoļuok nūtiks ar LgSC?
Tys atkareigs tikai nu Teve:
Tys ir Tovs laiks i Tova interese
Tī ir Tovi draugi i dūmubīdri
Tuos ir Tovys idejis, cereibys i azarts

Partū ka LgSC ir kai Leigū – pats leigoj, esi i pīsadoli, na verīs i gaidi. Svātkus nivīns atness, ka pats nasvieteisi i NVO nivīns Teve navarēs īļustynuot i podturēt, ka pats nadareisi, napīsadaleisi, naļusteisi i nasatureisi.

Nav laika? Drystynam nikod nav laika gona.
Bais, ka nasaīs? Ar acim teiruma naaparsi, ar akminim zvaigžņu nu dabasu nanūgrauduosi.
A kū ta es vīns? Gribi pazeit drauga, pasauc paleigā pi dorba.
Voi ta tys vyspuor ir īspiejams? Kūks nakreit ar pyrmū ciertīni.

Paļdis vysim par atbolstu, par īguļdeitū laiku, prīcu, energeju i kūpā padareitajim dorbim!

Ilze

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.