Pasaulī vīneigajam latgaliski rokstūšajam portalam 10 godi


Itūgod paīt 10 godi nu tuos šaļts, kai sovu dorbu suoce Latgalīšu kulturys ziņu portals lakuga.lv. Tys ir pasaulī vīnaigais portals, kura saturs teik veiduots tikai latgalīšu rokstu volūdā, kas dīnys viestejūt par Latgolys kulturys aktualitatem i latgaliskom nūtikšonom vysā pasaulī.

Portalu lakuga.lv 2007. godā izveiduoja jaunīšu bīdreiba “Latgolys Studentu centrs” ar studentu degsmi i gribiešonu puorgrīzt pasauli. Bet portala nūsaukumu “Latgalīšu Kulturys Gazeta” (saeisynuotai LaKuGa) radeja dzejnīks Valentins Lukaševičs. Oficiali lakuga.lv sovu dorbu suoce 2007. goda 14. julī.

Desmit godu pastuoviešonys laikā LaKuGa ir palykuse par latgaliskuos identitatis naatjamamu daļu i sova veida Latgolys vizeitkarti. Tymā vīnuvīt atrūnama informaceja par ituos šaļts aktualitatem latgaliskajā kulturā, latgaliski rokstūšūs literatu pyrmpubliciejumi, Latgolys muzykys grupu jaunuokuos dzīsmis i video klipi. Portala veiduotuoji lelu viereibu pīvierš sabīdreibys izgleituošonai par regiona viesturis, kulturys i volūdys vaicuojumim, pīduovojūt profesionaļu veiduotus rokstus. LaKuGā atrūnamys ari intervejis ar īvārojamom Latgolys personeibom, kai ari sabīdriskūs i kulturys darbinīku redzīni par regiona kulturys dzeivē aktualom problemom.

Ar sovu darbeibu LaKuGa pīvierš vysys Latvejis viereibu latgalīšu volūdys situacejai, taidā veidā saglobojūt, aizsorgojūt i ari atteistūt latgalīšu volūdu. Portala redaktore Laura Melne soka: “Prīca, ka LaKuGa sovys darbeibys laikā ir pīruodejuse, ka latgalīšu volūda nav tikai sātys volūda, bet tai ir ari vīta interneta teimeklī. Taipoš kai sevkurā volūdā, ari latgaliski var runuot i raksteit par vysaidom temom, tū skaidri aplīcynoj LaKuGys asameiba. Itūs godu laikā LaKuGa ir palykuse par sova veida informacejis kruotuvi par Latgolu i latgaliskū, tei ir vīta, caur kuru izzynuot Latgolu.”

LaKuGys lelū davumu itūgod nūvērtēja Latgalīšu kulturys goda bolvys “Boņuks 2016” žureja, pīškirūt Boņuku par latgalīšu volūdys populariziešonu.

Projekta “Latgaliešu kultūras ziņu portāls lakuga.lv” vadeituoja Vineta Vilcāne uzsver: “Asam gandareiti, ka portala skaiteituoji ir nūviertiejuši myusu dorbu i pīsadalejuši satura veiduošonā. Sovys īceris asam variejuši eistynuot, regulari pīsaistūt finansiejumu projektu konkursūs. Iz vysa leluokais paļdis Vaļsts kulturkapitala fondam, kurs myusu īceris daudzu godu garumā ir atziņs par gona vierteigom i vajadzeigom i atbaļstejs myus finansiali. Tys aplīcynoj, ka latgalīšu volūdys saglobuošona i atteisteiba ir svareiga na tikai mums pošim latgalīšim, bet vysai Latvejis sabīdreibai.”

Portala lakuga.lv jaunumim leidza var sekuot socialajos teiklūs: facebook.com/LaKuGa.lv, twitter.com/LaKuGa i draugiem.lv/lakuga.lv.

Informaceju sagataveja
Projekta “Latgaliešu kultūras ziņu portāls lakuga.lv” vadeituoja
Vineta Vilcāne

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.