Rss Feed Tweeter button Facebook button Youtube button
Latgolys Studentu centrs
Par LgSC dzeivi i sadzeivi
LgSC pavasars Rēzeknē

LgSC Rēzeknis nūdalis bīdri  i draugi ari pavasarī turpynoj byut pozitivi i jaunom idejom boguoti.

23. martā iz sapuļci tyka aicynuoti LgSC daleibnīki. Īsaroduos studenti, vairuoki nu tim pyrmū reizi. Leidz ar tū naizpalyka ari īsapazeišonuos aktivitatis. Tikšonuos golvonais mierkis beja apsasprīst par LgSC tyvuokajā laikā plānuotajim pasuokumim. Ideju beja daudzi i cīši lobys. Lai dorbs veiktūs dreižuok, tyka izveiduotys vairuokys grupys. Kotrys grupys daleibnīki atkluoja sovu redziejumu par pasuokumim, kurus jī grybātu sataisiet. Tyka padūmuots gon par prasmju atteisteibu i pylnveiduošonu – ir ideja reikuot latgalīšu rokstu volūdys piecpušdīni, gon par cylvāku apvuoršņa paplašynuošonu, īmyužynojūt vysu, kas ir saisteits ar Latgolu i latgaliskū video versejā, taidā veidā īraugūt sovu tāvu zemi caur objektivu, sovaižuoku, varbyut kuram i meiluoku. Taipoš ari latgalīši zyna, ka „vasalā mīsā – vasals gors”, deļ tam LgSC bīdri i draugi ir gotovi jimt daleibu Lelajā tolkā, kas nūtiks 30. aprelī, taidā veidā na tikai sakuortojūt apkuortni, bet ari pavodūt laiku pi dobys. Aktivuokom  izdareibom iz vosorys pusi ir plānuots maratona skriejīņs. I kas gon ir eists latgalīts bez ļusteigim daņčim?! Kur? Īspiejams, ka studentim īrostā vidī – kaidā dīnesta vīsneicā. Tyss vyss, kai ari vairuoki jau tradicejom boguoti pasuokumi, seminari, projekti gon vēļ ir tapšonys i sagatavuošonys stadejā, tūmār LgSC aktivisti tai aizaruove, apsprīžūt variantus i īspiejis pi čaja kruškys, ka laiks paguoja cīši mudri.

28. martā LgSC daleibnīki sasatyka vēļ raizi, sperūt sūli tyvuok ideju realiziešonai – tyka saraksteits pasuokumu grafiks, deļ tam, ka grybit pīsadaleit kaidā nu LgSC aktivitatem, veritīs jaunuokuos viests!

I vēļ. Pādejuos nedelis LgSC aktīvisti i Rēzeknes Augstškolys studenti aktivi dorbojās pi video par studentu dzeivi fiļmeišonys. Gaidom video!

LgSC bīdrus i draugus varēs satikt ari Rēzeknes Augstškolys Informacejis dīnā (15. aprelī)!

Ir lels prīks, ka jaunīšim aizvīn pīaug interese par Latgolys kulturvidi i sabīdriskajim procesim, leidz ar tū pīaug ari LgSC daleibnīku skaits!

Sagataveja: Kristina

Puorpublicāts nu: http://lakuga.lv/posts/latgolys-studentu-centra-lgsc-aktivitatis-rezekne/

 

 

Pastuosti cytim!

Leidzeigī roksti:

Leave a Reply