LgSC naparoksta partejis "Sabiedrība citai politikai" viestuli NRTVP

Politiskuos situacejis nastabilitate i varys krize vaļstī ar vodūšus politiskūs spāku krahu i jaunu spāku, līderu mekliejumim i ceņtīnim izaraut prīškysgolā, taipat pošvaļdeibu, Eiroparlamenta i ak jau i Latvejis parlamenta vieleišonu tyvums naīt garom ari navaļstiskajom organizacejom. Ari LgSC kai aktiva i stabila NVO ir sajāmuse vairuokus aicynuojumus sasadorbuot ar politiskajom partejom: kai mudynuojumus īsapazeit ar jūs sadarbeibys pīduovuojumim, tai lyugumus paraksteit jūs sagataveitus dokumentus.

Par pīmāru, 12. februarī tyka sajimts aicynuojums nu partejis “Sabiedrība citai politikai” bīdru Alda Cimoškys i Gundegys Rancānis leidz ar cytom NVO, Daugovpiļs Universitati i avīzi “Latgales Laiks” paraksteit NRTVP adreseitu viestuli. Jimā tyka praseits NRTVP skaidruojums par “Latgolys Radejis” puortraukšonu raideit latgaliski i lyugums izmeklēt itū gadīni, kai ari lemt par dotacejis pīškieršonu raidiešonai latgaliski.

Tei poša parteja leidzeigu aicynuojumu beja izplatiejuse jau februara suokuos. Atsauce iz tū tyka publiceita latgaleslaiks.lv.

LgSC vaļde nūlēme naparaksteit itū dokumentu. Tai kai bīdreibā ir bīdri ar vysaidom politiskajom puorlīceibom, saskaņā ar bīdreibys vaļdis lāmumu LgSC itaidus paziņuojumus i īsnīgumus var snīgt tikai atseviški voi sasadorbojūt ar cytom NVO i navar publiski atbaļsteit nivīnu konkretu parteju.

Tai kai latgalīšim ir juobyut vīnuotim sovu mierķu sasnīgšonai i LgSC atbolsta latgaliski raidūšys “Latgolys Radejis” atjaunuošonu voi cyta latgaliski raidūša medeja izveidi, atbolstu, bīdreibys vaļde pījēme lāmumu par taida voi leidzeiga aicynuojuma sagataveišonu, verūtīs piec aktualajim apstuoklim.

Pastuosti cytim!

One Reply to “LgSC naparoksta partejis "Sabiedrība citai politikai" viestuli NRTVP”

  1. Man ir kauns i man ir lapnums. Man ir kauns par Latgolys Studentu centru i lapnums par tīm deveņim cylvākim- latgalīšim i čiuļim , kas stuņdi leitā i soltumā stuovēja Dūma laukumā pī NRTP ākas i izteica tū kū daudzi dūmoj, kū daudzi izjyut. Man ir lapnums, ka cylvāki cēlās četrūs nū reita, lai laiceigi tyktu Reigā, ka izabreivēja breivu breidi nū ikdīnas dorba.
    Dīmžāl LgSC paziņojums : „Latgolys Studentu centrs atbalsta protesta akciju pie NRTVP” myusus nasasiļdēja. http://www.delfi.lv/news/soapbox/soapbox/article.php?id=23357980
    Mēs, vairuokas latgalīšu organizacejas, tuos pošys, kas LgSC pyrms goda aicynuoja apsavīnuotīs i izveiduot kūpeigu padūmi – nāvālamīs lātu popularitati voi koč kaidu lobumu. Mēs izteicam tū kū dūmuojam. Mēs patīšam cerējam, ka LgSC pīsabīdruosīs myusu pulkam, mēs cerējam iz studentu jauneibas maksimālismu, iz LgSC bīdru iztureibu, kai nikai Sibirī pī latgalīšim pīdzeivuots i minus 40 gradu sols. Dīmžāl tys tai nabeja. Reikuot piketu nav tys pats, kai sēdēt syltā ustobā i raksteit aiļis. Mēs cerējam iz Reigas latgalīšu atbolstu, a L.Leikumys atteikums , ka Trešuos Zvaigznis latgalīši ir par vacu, byutu pījamams, lai gon Slūkas īla nav tuoļuok kai Dūma laukums. Borowa, kas asūt myužeigi ceļā, līkas ir apzastuojušīs iz vītys, jūs runys veira arguments, ka krīzis laikā nav gudri praseit vaļsts atbolstu latgalīšu medijim ir vairuok nakai smīkleigs.
    Nabeja jyusu kūpā ar myuisim. Man atlīk vaicuot , kas jyus esit ? Latgalīšu patrioti, eiropīši, aiļiņīki, diletanti, slovys alkonī, nasekmeigī studenti, voi sevī isaruovušīs vāruotuoji ar saukli: ka tyk kas nanūtyktu? Mēs asam latgalīši, kam sirds dag par mysu tautys i volūdys nuokūtni. Mēs myusu mērču sasnīgšonai asam ar mīru izīt īluos, jyus dīmžāl nā. Man žāl , ka izjamūt Juri Viļumu ņivīns nū jyusu akteivajim bīdrim napaklausēja aicynuojumam „brīvi izvēlēties, atbalstīt ekspresīvu protesta formu”.
    Myusu vydā taipat beja i studenti, i aiļiņīki, i školāni, i muzykanti. A jyusu šudiņ nabeja. Par kū ? Atbiļdi Delfu portālā „Nepolitiskā jauniešu biedrība „Latgolys Studentu centrs” snīdz poša : „Latgales Studentu centrs politisku apsvērumu (!!!!) dēļ nav šo biedrību vidū.. .” Kaidi ir jyusu polityskī apsvārumi ? Nū kura laika Da Gunči vadeituo bīdreiba „Latgolys Producentu Grupa” , Uškāna bīdreiba „Latgalīšu Etnokulturys centrs”, voi Bīdreiba „Latgolys tradicionaluos kulturys centrs „Latgaļu sāta”, nimoz narunojūt par Anša bīdreibu „LR” ir politiskys organizacejas? Kurš nū myusim i kaiduos partejos sastuov, i kaidi ir myusu politiskī mērči, kas naatbilst ceistajam LgSC tālam? Par kū jyusu nav tur, kur jyus esit vajadzeigi? Jyusem napateikt Gabrišs, Mjartāns, Bērzeņš, Turlajs, Zeimule?? Tod pasokit myusim tu acīs, navys rokstit garys atrunys peršys Delfūs i citur.

Leave a Reply to dainis Cancel reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.