LaKuGys dorbam 2015.godā Kulturkapitala fonda finansiejums

lakuga“Latgolys Studentu centra” uzturātais portals lakuga.lv (Latgalīšu Kulturys Gazeta) dorbojās jau nu 2007. goda.  Pyrms 3 godim LaKuGa atsuoka aktivu darbeibu, kasdīnys viestejūt par latgaliskom nūtikšonom Latgolā, Latvejā i pasaulī.

Portals latgalīšu i puorejuos Latvejis īdzeivuotuoju vydā ir īmontuojs atpazeistameibu kai vītne, kurā var īpasazeit ar jaunuokū latgalīšu muzyku, literaturu i jaunumim cytuos muokslys formuos, izzynuot par aktualitatem regiona kulturys dzeivē i procesim paguotnē. Jau vairuokus godus portalam ir nūzeimeiga lūma Latgolys regiona kulturys izaugsmis veicynuošonā.

Īsuoktais dorbs nanūstuoj, i ari 2015. godā LaKuGā varēs skaiteit viests par latgaliskom nūtikšonom. LgSC projekts „Latgaliešu kultūras ziņu portāls lakuga.lv” ir sajiems Vaļsts kulturkapitala fonda atbolstu portala darbeibys nūdrūsynuošonai da 2015. goda 30. juņa. Projekts paredz, ka eipaša viereiba tiks veļteita myusu dīnu latgalīšu literaturys i jaunradis atpazeistameibys veicynuošonai. Partū aicynojam rodūšūs latgalīšus naturēt sveci zam pyura i pasadaleit ar sovim dzejūlim, stuostim, dzīsmem i cytim gora dorbim, dūdūt sovu pīnasumu kulturys izaugsmē. Taipat ari aicynojam sevkuru izsaceit redzīni par nūtikšonom latgalīšu kulturā i pastuosteit par sovys pusis latgaliskajom nūtikšonom, rokstūt iz e-postu info@lakuga.lv.

Vineta Vilcāne
projekta „Latgaliešu kultūras ziņu portāls lakuga.lv” vadeituoja

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.