LaKuGa turpynoj dorbu
Latgalīši vysod ir izacālušs ar jaunom i rodūšom idejom, paruodūt, ka nikas nastuov iz vītys, i ka ir gotovi īt leidza i varbyut pat reizem apsteigt sovu laikmatu. Vīna nu puordrūsuokajom idejom ir bejuse latgaliski rokstūšais kulturys portāls „Latgalīšu Kulturys Gazeta” aba www.lakuga.lv, kurs itūšaļt ir palics jau par vīnu nu latgalīšu kulturys vierteibom i vēļ arviņ ir pasaulī vīneigais latgaliski rokstūšais interneta medejs. Portalā vīnuvīt ir pīejama jaunuokuo informaceja par Latgolys i latgalīšu tradicionaluos i laikmeteiguos kulturys aktualitatem, izsmeļūši i profesionaļu veiduoti roksti par regiona viesturi, kulturu i nūzeimeigom personom. Taipat tei ir vīta, kur jaunajim i jau pīredzis boguotajim latgalīšu literatim ir īspieja laseituojus īpazeistynuot ar sovu daiļradi. Bīži viņ portala laseituoji ir pyrmī, kas izzynoj par aktualitatem latgalīšu muzykā. Portals ir palics par sova veida latgalīšu puļciešonuos vītu internetā.
Projektu „Latgalīšu Kulturys Gazeta” jau nu 2007. goda realizej bīdreiba „Latgolys Studentu centrs”, i itūšaļt tys dorbojās ar Vaļsts kulturkapitala fonda atbolstu. Jau divejus godus piec kuortys www.lakuga.lv ir sajāmuse Latgalīšu kulturys goda bolvu „Boņuks” kai lobuokais latgalīšu kulturys medejs.
Portalam ar sovu darbeibu ir izadevs latgalīšūs veicynuot pīdereibys sajiutu regionam i styprynuot nacionalū identitati, sekmēt sabīdreibys izpratni par Latgolys kulturys specifiku i tuos vītu Latvejis myusdīnu kulturys telpā.
Aicynojam ari pošus latgalīšus īsasaisteit portala satura veiduošonā i īsyuteit informaceju par sovys pusis latgaliskajim pasuokumim, viertiejumus par kulturys aktualitatem, rokstus par regiona viesturi, kulturu i cylvākim, rokstūt iz epostu info@lakuga.lv. Taipat gaidom ari jaunūs latgalīšu literatu dzejūļus i stuostus, muziķu jaunuokūs skaņdorbus.
Portala jaunumim leidza var sekuot ari socialajūs teiklūs facebook.com/LaKuGa.lv i twitter.com/LaKuGa.