LgSC laivu braucīņs 11. i 12. septembrī
Nasiedi kai bednais sābru suņs aiz vuortu!
Deļtuo vuortim ir kļamka, kab cylvāks tyktu vydā i nasystu sīnu ar pīri voi žieleigai nakauktu pi cīš vuortu. Rudiņs, solts, vyss rībās? Gribi, kab kas naviņ interesnys nūtyktu? Nu, tod pīsadoli tymā, kas nūteik!
Brauksi LgSC laivu braucīnī?
Juobrauc!
Pīlauz sovu lobuokū draugu, atrūnit laivu, telti, guļammaisus i braucam!
11. i 12. septembrī LgSC laivu braucīņs
„Valkam rūbežus Latgolai”
Suokums ap 10 stuņdem reitā pi Aivīkstis slūžu pi Lubuona azara.
Nu iudiņa izleissim cytys dīnys beiguos pi Lubuonys mīsta.
Nu Lubuona da Lubuonys pa upi ir 37 km. Guleišona pa nakti upis krostā zam plyku dabasu (teltī). Trokim pīdar pasauļs.
Kas juodora?
Juoatrūn laiva. Atkareigs nu poša īspiejom – var i gumejis pyusli, i kaidu lapnuoku – upe izbraucama ar vysom.
Juoatrūn lobi cylvāki. Voi ta Tev draugu nav? Klasisbīdru, studeju bīdru, sābru, dvieseļu radinīku? Vys jau jūs vydā ir ari trokī, kas gribēs pīsadaleit. Tauteibai i volūdai nav nūzeimis, svareiga leidza byušona.
Juonūdrūšina sevi ar syltumu. Pajem leidza syltu driebu kuortu, telti, guļammaisu, syltuos apakšbiksis, termoforu i vysu cytu nakšņuošonai vajadzeigū.
Juosaryupej ūdere sovam vādaram. Cytim vuordim sokūt, paiku napamet sātā, a jem leidza. Ka ni pošam, to sābram Tova studiņa bļūda byus kai reize. (Babys studiņš cīši lobs. Tikai daudzi motu. © Raibīs Suņs)
Juoteik da maršuta suokuma punkta. Tys ir pi Aivīkstes iztakys nu azara – slyužom. Var dabraukt nu Gaigalovys, nu Nagļu i nu Ūšupis pusis. Nu Lubuonys vys jau kai tiksim prūm. Tī ir i autobusi, i vys kū sadūmuosim ar mašynom, ka tik byus braucieji.
Juopīsasoka. Da 9.septembra joupadūd ziņa Vinetai iz e-postu vineta.grigane i gmail.com – cik byusit, vuords, uzvuords, telepona numers, e-posts sev i vysim leidzbrauciejim! Lai jei var saskaiteit ļauds, nūsyuteit smolkuoku info par izbraukšonys laikim itt. Ka Tev ir breiva vīta teltī ci laivā – ziņoj, gon jau kaids gribēs pīsavīnuot.
Ituo goda himna – gobols nu M. Gruzeiša legendaruos dzīsmis „Aivīkstis ūzuli”:
„I tod es ībrīnu zīdūs i klonūs”
ci
„Un tad es iebrienu ziedošos klānos”. 🙂
Jem leidza draugus i braucam pīdzeivuojumā preteimā zalta rudiņam! 🙂
Vacumdīnuos varēs tust i bezdēt iz cepļa.
Cikom jauns, juokust!