Latgalīšu volūdys kursi pyrmūdīņu vokorūs

Izkūpsim sovu latgalīšu rokstu volūdu!
LgSC reikuotī latgalīšu rokstu volūdys kursi Reigys centrā nūteik pyrmūdīņu vokorūs da semestra beigu.

17:00 – volūdys pamati

18:00 – kai pareizi raksteit

Latvejis Nacionaluos bibliotekys telpuos, iz Elizabetis i Barona īlys styura, Barona 14, 3. stuovā, 312. ustobā taišni trepēs.

Nav svareigi, ci ar latgaliskū vuordu iz lyupu pasamūst nu reita ci Tev tikai ir interese par ūtru latvīšu volūdys rokstu tradiceju – kursūs Tev atsarass vīta.

Nasacesnej i nasabeist nikuo – vadeituoji nav pyrmū reizi ar peipi iz jumta (i vēļ ni reizis biblioteka nav nūdaguse).
Kai jau īrosts, kursi tiks pīduovuoti divejūs variantūs – interesentim bez prīkšzynuošonu i tim, kas latgaliski runoj daudzi i niule gryb īsavuiceit raksteit.

Pamatleimeņa nūdarbeibys īsasuoc 17:00. Juos kai i da šuo vadeis filologejis magistrante Kristīne Zute. Ite uzsvors byus lykts iz latgalīšu volūdys pamatu – runuošona, drupeit raksteišona.

Augstuokuo leimiņa nūdarbeibys īsasuoc 18:00.
Juos vadeis filologejis magistre Muora Mortuzāne. Ite golvonais byus raksteišona, raksteišona i raksteišona.

Ka ni reizis naesi bejs kursūs – niu ir īspieja tū izdareit i suokt.

Ka esi guojs pārņ – atej nūstyprynuot zynuošonys i turpynoj!

Kū var zynuot – varbyut Latgola dīnuos byus jaunuo Amerika, kur iz prīšku nūtiks vysa attīsteiba. Esi pyrmais itymā viļcīnī i naguli!

Tys, kū zini, iz placu nav juonas – atej iz kursim i īsavuici!

.

Kursus atbolsta VKKF i LNB.

Tys kursu klauseituojim dūd īspieju sevi izgleituot bez papyldu moksys, kas krīzis laikā ir gona svareigi.

.

Pastuosti cytim!

2 Replies to “Latgalīšu volūdys kursi pyrmūdīņu vokorūs”

  1. Sasdin, 26.sentebra 9.reita stuņdē Reigā, Eiropys volūdu dīnā, pī Reigys
    vaļsts 1. gimnazejis byus pikets, kab dagrīztu ļaudeibys viereibu latgaļu
    volūdai i latgaļu volūdys situacejai Latvejā i Eiropā.

    Eiropys Volūdu dīnu nūslāguma pasuocīņs byus drusku vāluok, zeimeigi, ka tymā
    pošā 1. gimnazejā. Nūslāguma pasuocīnī nūtiks volūdu darbneicys, kuruos
    popularizēs, ruodēs i vuiceis Eiropys volūdys, volūdu daudzveideibu Eiropā i
    kotrys volūdys sovdabeibu.

    Volūdu darbneicuos byus daudzys eiropīšu volūdis, arī latvīšu i līvu, bet,
    dīvamžāļ, nabyus senejuos latgaļu volūdys, koč Vaļsts volūdys lykuma 3.panta
    4.apakšejīs punkts soka, ka „Vaļsts nūdrūšynoj latgalīšu rokstu volūdys kai
    senejuo latvīšu volūdys paveida globuošonu, sorguošonu i tuoļuoku taiseišonu”.
    Itamā dīnā, kai reiz, vaļstij vajdzēja paruodeit sovu lobū gribu i vajdzēja
    volūdu darbneicā ruodeit latgaļu volūdu! Izaver, ka volūdys lykums ir formals,
    i valstij patīseibā naryup ni latgali, ni jūs volūda!

    Eiropys Volūdu dīnys opicialai reikoj Latvīšu volūdys agentura. Praseju
    agenturai i pīduovuoju, ka Volūdu dīnu volūdu darbneicā poši latgali cytim
    interesentim varātu pastuosteit kūnabeis par sovu volūdu i raksteibu. Latvīšu
    volūdys agentura tū naatbaļsteja, sokūt, ka pīduovojums ejūt par vālu, ka
    vysys reklamis i programmys asūt nūdrukavuotys i nikaidu mejumu nabyus! Jim
    daudz svareiguoka ir preciza i pareiza programma…bez latgaļim.

    Jūceiguokīs, ka inpormaceju par Volūdu dīnom uzzynuoju nū tom pošom reklamom,
    kurys volūdys agentura niu nagrib puormeit. A vajadzēja, ka volūdys agentura
    poša dajādz, a na gaida, ka kaids nū molys pasceis, ka itamā pasuocīnī juobyut
    ari latgaļu volūdai!

    Niu pošim latgalim ir juoīt pī 1.gimnazejis, kur nūtiks Volūdu dīnu pasuocīni,
    i juoparuoda, ka myusem ir sova volūda, raksteiba i unikala literatura!

    Latgaļu volūda ir latgaļu etnosa ašni! Nazaļausim nūkaušonai kai oklu vušku
    bors! Latgali, vysi iz piketu!!!

    Piketu reikoj Mareks Gabrišs (26553723) i bīdreiba «Latgolys tradicionaluos
    kultūrys centrs «Latgaļu sāta»». Piketa reikuošonai ir atļuove nū Reigys
    dūmis.

  2. Pingback: Novembris « Latgolys Studentu centra dīnroksts

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.