konkurss blogerim: nasoki nui, nasoki nā!

Vasals, bruoļ! Vasala, muos!

Jaunā godā LgSC Tev pīduovoj, 3 īspiejis:
automatiskū gruomotys vuoka paceļšonys mehanismu,
manualū latgalīšu literaturys papyldynuošonys agregatu,
dinamiskū rodūšuo i dorūšuo spāka skrytuli.

Jaunuo goda suokumā – pyrmais realais ituo goda pīduovuojums.
Taišni deļ Teve.

Tev ak jau ir kaida sātyslopa voi dīnroksts, blogs, emuars voi vīnkuorši teiklavīta, kur pīraksteit sovus stuostus par dzeivi, puosokys i vysaidus breinumus? Ir?

Nu tod klausīs tuoļuok, kū stuosteišu!

Vysi soka, ka krīze, vyss brīsmeigai i nav nikuo loba iz pasauļa.
Tok švaki ir tik tam, kas ir pagaisynuojs ticeibu sev i cereibu iz prīšku. Cikom dori sovu dorbu i pasaļaun iz seve, ir īspieja, ka byus lobuok. Partū ka agri voi vieli byus lobuok – dzeive ir leigačys, kas nas augšā i lejā.
Tik reizem dzeive aizagiun aiz kaida sakuorņa. Tod pošam juopaleidz itom leigačom otkon īsaleiguot skriejīņam iz augšu.

Puosokuos vyss kai dzeivē. Nu suokuma vyss brīsmeigai, pa vydu daudz dorba, a beiguos otkon labi.
Vēļ vaira – kab na leluos bādys, darbeiba vysā naīsasuoktu i ni trešais tāva dāls, ni pastareite, ni spreideits i pedeleits naizītu nu sātys. Kab na tuos bādys, jis tai i myužam palyktu tik trešais tāva dāls, buorineite i pūdulyžga, pādejais nu pādejūs.
Ejūt puosokys ceļu, jis pīdzeivoj vysa kuo, jam juoizaškir storp lobu i ļaunu, juoteik puori vysam kam.
Puosokom vysod ir laimeigys beigys. Vysys puosokys ir par krīzis puorvareišonu.

Latgalīšim seņ nav bejs pošu raksteitu puosoku gruomotys.
Deļtuo mes, bīdreiba “Latgolys Studentu centrs”, izdūmuojom izdūt jaunu latgalīšu gruomotu “Es soku. Tu soki. Puosokys par krīzi.”

Troki? Nui!
Tok KKF padūmuoja, ka trokim pīder pasauļs, i atbaļsteja itū ideju. Taipat ar sovu paleigu ir atguojuši ari puors zīduotuoju.
Naudys kai vysod nav gona, tok gruomota byus.
Ka krīze smejās par myusu planim, mes pasasmīsim par jū i dareisim sovu.
Varbyut saīs. I saīs – tai voi cytaižuok.

Gruomotai byus itaidys dalis:
latgalīšu folklorys puosokys,
latgalīšu rakstnīku puosokys,
Latvejis bārnu i jaunīšu stuosti ar laimeigom beigom,
taupeigu iedīņu i taupeigys dzeivis recepti,
dereigi padūmi, kai lobuok dzeivuot, i stuosti par dzeivi.

Kab gruomota saītu loba, vajag taišni Tova paleiga.
Nui! Tova!
Ka Tu īguoji itymā lopā, puorskaitieji i tyki da ituos vītys, atpakaļceļa vaira nav. Jau esi puosokā.

Nasoki nā, nasoki nui! Nasoki malns, nasoki bolts!
Pa labi īsi, golvys pagaisynuosi, pa kreisi īsi, zyrga pagaisynuosi, taišni īsi, pats pagaissi i myužam naatsarassi.

Izvēle Tovā ziņā.
Pyrmuo – pīraksteit sovā dīnrokstā sovu literarū puosoku.
Ūtruo – pīraksteit dīnrokstā taupeiga iedīņa voi taupeigys dzeivis receptu.
Trešuo – dīnrokstā apraksteit gadīni nu dzeivis ar laimeigom beigom.

Puosoka
Vyss kai dzeivē, vyss kai puosokā. Tema breiva, tok veiksmis gadīnī dasadur myusu dīnu dzeivei vaira nakai, par pīmāru, 1. Pasauļa karam, izpiļdiejums i pagrīzīņs breivs.
Vīneigi juosagloboj puosokys žanram atbylstūšais – stuosts par ceļu ar laimeigom beigom.
Cik gara? Nu 3000 da apmāram 7000 – 9000 zeimu.

Taupeigī recepti
Iedīņa recepts: 1000 zeimēs par iedīni, kū var sataiseit par 1 latu deļ saimis: 2 lelī, 2 bārni i 1 gosts.
Dzeivis recepts: 1000 zeimēs zalta vārts padūms, kai lobuok ītaupeit naudu i resursus i dzeivuot lobuok.

Stuosts par dzeivi
3000 – 5000 zeimu par kaidu gadīni nu dzeivis, kod vyss varēja byut cytaiž a saguoja kai dzeivē – labi.
Tuos var byut bieneibys atminis, burlaku goboli nu studeju dzeivis i blūdeišonys pa pasauli, nu dzeda montuoti stuosti i vysaidi najauši saklauseiti i tycami breinumi.
Voi ta latgalīšam ilgi kuldā piec stuosta juomeklej?

Termeņš kai jau vysim īsuoktim dorbim – da goda beigu. Nūticieji?
Da ituo goda janvara beigu.

Ka Tev nader nivīna nu itūs treju īspieju, vari nu LgSC atsapierkt ar naudu.
Zīdoj vysmoz 5 latus i dabuosi gruomotu par veļti.

Rekviziti: bīdreiba “Latgolys Studentu centrs”, registracejis numers 40008095461, a/s “Swedbank”, BIC kods HABALV22, konts  LV21 HABA 0551 0120 6469 3. Pi moksuojuma daroksti mierki: Puosokys par krīzi.

Kod tī lobī godi beja, vyss beja cytaiž.
A niu ir tai…
Pastuosti, kai niu ir. Pastuosti, kai tī tūreiz beja!

Pi sovys puosokys, recepta voi stuosta dalīc saiti (hyperlink) iz itū rokstu i dalīc atslāgys vuordus “Puosokys par krīzi”.

Ka gadīnī beistīs, voi lelajā škārsteiklā i juo bezgaleigajuos tuolīnēs īsavērsim Tova dorba, atroksti LgSC tviterī voi iz e-postu lgsc i inbox.lv! Taipat pa DM tviterī voi e-postu vari atsyuteit sovu vuordu, uzvuordu, kontaktīspiejis.

Specialais aicynuojums latgalīšu blogerim: cyxob.lv, krizdabz.lv, skreine. org, Raibīs Suņs, Sauve, Lalilaans, Lynuojs, Ingrida Tārauda i Jureits – rokstit poši, licit sovā dīnroksta i palaidit itū ziņu iz prīšku! 🙂

Konkursa nūlykums

Konkursā var pīsadaleit sevkurs, kas puorskaita itū ziņu.

Dorbus var publicēt teiklā, ka ir sova sātyslopa voi blogs, kai ari īsyuteit pa postu voi e-postu.

Dorbus var īsnīgt latgalīšu rokstu volūdā voi latvīšu literarajā volūdā (gruomota tiks izdūta latgaliski, deļtuo vajadzeibys gadīnī dorbi tiks tulkuoti).

Dorbi īsnīdzami puorskaitamā rūkrokstā voi datorrokstā (atstarpe 1,5 i burtu izmārs 12).

Viertiešonys parāds
Konkursam īsnīgtūs dorbus viertej bīdreibys „Latgolys Studentu centrs” vaļde i juos pīaicynuotuos personys.
Plagiati i tematam naatbylstūši dorbi nateik vārtāti. Dorbūs paustais vīdūklis var nasakrist ar konkursa reikuotuoju vīdūkli. Dorbi nateik syuteiti atpakaļ autorim. Autortīseibys pīdar rodūšūs dorbu autorim, a konkursa reikuotuojim pīdar tīseibys publicēt konkursa dorbus pylnā voi saeisynuotā versejā.

Dorbu īsyuteišona

Dorbu var publicēt sovā sātyslopā voi blogā i kluot dalikt atsauci iz itū rokstu i atslāgys vuordus “Puosokys par krīzi”.

Dorbus var syuteit bīdreibys „Latgolys Studentu centrs” Reigys birojam Antonejis īlā 8-3/6, Reiga, LV – 1010, ar nūruodi „Rodūšūs dorbu konkursam” da 2010. goda 31. janvara (posta zeimūgs, syutūt pa postu) voi iz e-postu: lgsc i inbox.lv.

Obejūs gadīņūs lyudzam nūruodeit: vuordu, uzvuordu, vacumu, e-postu i kontakteleponu.

Rezultati i apbolvuošona
Lobuokī stuosti tiks publiceiti stuostu izlasē i portalā www.lakuga.lv
Rezultatu paziņuošona 2010. goda februarī, martā, apbolvuošona gruomotys prezentacejis laikā.

Pastuosti cytim!

6 Replies to “konkurss blogerim: nasoki nui, nasoki nā!”

Leave a Reply to Myužeibys i minusi « Elegantys vibrācejis cytā gaumī Cancel reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.