Rss Feed Tweeter button Facebook button Youtube button
Latgolys Studentu centrs
Par LgSC dzeivi i sadzeivi
Kai myusim guoja LgSC Daugovpiļs biroja atkluošonys pasuocīnī…
Categories: LgSC sadzeive

Ituo goda 30. aprelī, Daugovpilī nūtyka bīdreibys „Latgolys Studentu centrs” Daugovpiļs nūdalis jaunuo biroja atkluošonys pasuocīns.

Cylvākam nu molys, kurs sekoj leidza LgSC Daugovpiļs biroja aktivitatem, varātu pasalikt: „Kas tī īpašs, jī tokš biroja atsarasšonys vītys maina divejis reizis godā i tai kotru godu!?”, bet es pasoku iz reizis, ka tai gon itūreiz nav. LgSC Daugovpiļs nūdale beidzūt ir atroduse sovu eistū, syltū vīteņu sūpluok latgalīšu kopejneicai „SĀTA”, pošā piļsātys centrā, pretim Daugovpiļs teatram (Vīneibys ūļneicā 17)!

Jaunajā birojā (voi kai latgaliskuok saceit — „dorba ustobā”) ir īspiejams satikt latgaliski dūmojūšus i runojūšus jaunīšus, apsamaineit ar jaunuokajom spletņom, izzynuot informaceju par tyvuokajim pasuocīnim, Latgolys viesturi, apsavērt i īsaguoduot jaunuokuos gruomotys i muzykys diskus latgalīšu volūdā i gols golā kliut par korstu LgSC atbaļsteituoju i bīdru.

LgSC Daugovpiļs biroja atkluošona nūritieja studentiskā gaisūtnē, īsaistūt vacūs laiku tradicejis myusdīnu interpretacejuos. Beja gon tradicionaluo kača laisšona ustobā, lai izūsnei vysus ustobys koktus, gon naudys mesšona jaunajā „sātā”, lai saiminīkim natryuktu puorticeibys, gon myusdīnu tradiceja — lentys grīsšona, kas, ejūt pret tradicionalū sorkonū kruosu, tyka izvālāta tymsi zyla – latgalīšu karūga kruosā. Lai „sātā” natryuktu prīcys, dzīsmu, latgalīšu volūdys, maizis iz golda, gosti i LgSC jaunuotne vīnuojuos kūpeiguos latgalīšu dzīsmēs, dančūs, sarunuos, tradicionalū latgalīšu iedīņu i dzierīņu baudeišonā. Juosaka lels paļdis LgSC jaunuotnei — Agnesei, Aigaram, Laurai, Romānam par spieleišonu, gostim — par dzīduošonu!

Grybātu pi reizis pasceit LgSC vuordā ari lelu paļdis kopejneicys „SĀTA” kolektivam, galdnīkam Edgaram i Juram par breineigajim goldim i benčim, i vysim, vysim kuri paleidzēja pi biroja īkuortuošonys dorbim!

LgSC Daugovpiļs birojs deļ gostu ir atvārts kotru dorba dīnu nu 10 reitā da 18 vokorā. Ite var nūpierkt latgalīšu gruomotys, muzykys diskus, pavysam dreiži ari suvenīrus; var izzynuot jaunuokuos viests par gaidomajim latgalīšu pasuokumim ci vīnkuorši atīt i parunuot latgaliski. Taipoš LgSC Daugovpiļs jaunuotne planavoj birojā taiseit tematiskūs vokorus i sasatikšonys ar Latgolā pazeistamim cylvākim.

Vaira informacejis vaicojit

rokstūt iz daugovpils@lgsc.lv,  

zvonūt iz 26326155 (Agnese).

Kai ari – portalūs lgsc.lv i lakuga.lv

Iz sasatikšonu Daugovpilī — ar sveicīni LgSC Daugovpiļs nūdalis interesents Artis Strods! 🙂

Pastuosti cytim!

Leidzeigī roksti:

Leave a Reply