Rss Feed Tweeter button Facebook button Youtube button
Latgolys Studentu centrs
Par LgSC dzeivi i sadzeivi
Izdūts kruosojams dzejūļu kruojoms latgaliski “Linejis”
Categories: Bez kategorejis

latgolaBīdreiba “Latgolys Studentu centrs” ir izdavuse latgalīšu kruosojomū dzejūļu kruojumu deļ pīaugušūs “Linejis”. Gruomotys tekstu autoris ir Jana Skrivļa-Čevere, Ligija Purinaša, Dagneja Dudarjonoka, Gunta Nagle, ilustraceju autore ir Ilze Gailāne, gruomotys redaktors — Valentins Lukaševičs. Kruojums izdūts ar Latgolys regiona atteisteibys agenturys, Vaļsts kulturkapitala fonda i AS “Latvijas Valsts meži” atbolstu.

Sevkura sasatikšona ir lineja: taisna, dzili vylkta voi nā, bezgaleiga voi aprauta. Tok cylvākā kūdulu veidoj vysaidys krystuošonuos ar cytim ļaudim: paraleli, perpendikulari, diagonalai, puortrauktai i napuortrauktai.

Ari kruosojamais dzejis kruojums “Linejis” ir pīcu sīvīšu sasatikšona i sajiutu geometreja, kurā kotra nu jom runoj sovā pasauļa uztveris volūdā i bolsā. Izdavums ir unikals ar tū, ka pīduovoj sovam skaiteituojam byut leidzdaleigam: skaiteit i dūmuot leidza, pīraksteit i, ka gribīs — izkruosuot malnboltuos ilustracejis, kas ritmiski īsalykušys storp dzejulim.

Gruomotys autoris aicynoj byut sūpluok prezentacejis pasuokumūs, kas nūtiks vairuokuos vītuos Latgolā. Tai kai gruomotā publicātuo dzeja ir daudzšķautņaina, ari prezentacejis pasuokumi ir dažaidi. Pyrmais pasuokums byus 7. decembrī Daugovpilī, barā “Artilērijas pagrabii”, 19 stuņdēs. Prezentaceju raksturojūšuo šķautne — nakts dzeive, dzeja kai flirts, kruosaini sajiutu kokteili, kas apreibynoj taipoš kai emocejis i naksneigi pīdzeivuojumi piļsātā. Ūtrei pasuokuma šķautne sasazeimēs reita pusē — 11 stuņdēs 10. decembrī Preiļūs, veikala “Ūga” kopejneicā, — dzeja kai reita čajs, dzeja kai kasdīnys sastuovdaļa, dzeja kai saruna pi brūkašku golda, dzeja kai dzeivis vajadzeiba.
Trešais pasuokums byus 16. decembrī Rēzeknē, Latgolys kulturviesturis muzeja 3. stuovā, 15 stuņdēs. Raksturojūšuo šķautne — dzeja kai izteiksmis forma, dzeja kai viesturis i volūdys līcineica, dzeja kai muokslys dorbs. Pasuokumu laikā byus vareiba klauseitīs, vērtīs, skaiteit, zeimēt, pīsadaleit konkursūs i vinnēt gruomotu!

 

Vaira dazynuošonys, zvonūt pa telefona nr. 28362243 voi rokstūt

iz e-posta adresu: dagneja@gmail.com

Leidzeigī roksti:

Leave a Reply