info LgSC 4. augusts

Vasali vosorā!

Pasaverit rokstu “Latvejis Viestnesī”. Varbyut ir kaidi komentari, vīdūkli?
Voi varbyut ir napīcīšama kaida LgSC reakceja – atbiļdis roksts, diskuseja voi informativa akceja?

LgSC vuordā vakar KKF tyka īsnīgti 7 projekti:
– latgalīšu muzykys karaoke disks (Edeite Husare);
– latgalīšu puosoku izlase “Tu soki. Es soku. Puosokys par krīzi” (Marita Papiņa);
– Danieļa Defo gruomotys “Robinzons Kruzo” (1935) atkuortuota izdūšona latgaliski (Ireta čekse);
– dzejis dīnu pasuokums, poezejis i muzykys performaņce “Tehnodzeja” (Egita Kancāne);
– gruomotys “Izlūkšņu tekstu hrestomateja” tipografiskī izdavumi (Lideja Leikuma);
– Baļtinovys amatīrteatra vīsizruodis Reigā (Vita Briška);
– Sibira latgalīši gostūs Latvejā, pasuokumu kūpa “Ceļš iz sātu” (Kristīne Zute).
Paļdis vysim projektu raksteituojim!
Tikai vīna, tok byutiska pībiļde ci lyugums: iz prīšku lyudzu projekta vadeituojam i dorba grupai paleidzeibys meklēt jau laiceigi i pādejā dīnā tikai īsnīgt paraksteišonai i apzeimūguošonai jau gotovu i izdrukuotu projekta aprokstu ar vysim pīlykumim. Lai var tikai paraksteit, na steigā i stresā drukuot, meklēt, lyugtīs. Partū ka kaida var byut puorlīceiba par īsnīdzamū projektu, ka dorba grupa ci vadeituojs naspiej laiceigi salaseit pats sovus papeirus… Pavirši sagataveiti projektu aproksti nav kvalitatis zeime i dorbs, ar kū latgalīšu i LgSC vuordu nest pasaulī.

SIF organizeitajā NVO konkursā tyka īsnīgts i pījimts projekts “www.vasals.lv – tuoļvuiceibys i resursu portals latgalīšu rokstu volūdys apgivei” (Ireta čekse, Artis Logins). Projektu konkursā tyka īsnīgts vairs par 140 projektu.

Preiļūs svātdiņ suokušuos “Atzolys” – LgSC organizeitais seminars jaunīšim.
Vaira skaitit itepat dīnrokstā.
I latvyski, par pīmāru, “Dīnā”.

Iz prīšku paradzāti itaidi LgSC pasuokumi i dorbi:
– leidz 1. septembram juoīsnīdz projekti programmai “Jaunatne darbeibā”, ka Tev ir 13-30 godu, vari taiseit sovu dorba grupu i guozt kolnus – 5. augustā informativais seminars par projektu raksteišonu;
– 3. septembrī pasuokums studentim Daugovpilī sadarbeibā ar DU, aicynoju atbaļsteit pasuokuma tapšonu, ka studej ci tymā laikā esi Daugovpilī (Jurs Viļums, jureits suneits jureits.lv);
– 5. septembrī tradicionaluos dzejis pasuokums Breivdobys muzejā sadarbeibā ar regionalajom autoru apvīneibom i Rakstnīku savīneibu, vajadzēs paleidzeibys iz vītys pasuokuma  laikā (Egita Kancāne, egita.kancane suneits inbox.lv)
– 15. septembrī dzejis dīnu pasuokums “Tehnodzeja” jaunīšim sadarbeibā ar RTU i Rakstnīku savīneibu, muzyka i teksti, zynuotne i poezeja, dreizumā tiks izsludynuots studentu rodūšūs dorbu konkurss, cīši gaideiti vysi trokī i rodūšī pasuokuma dorba grupā! (Egita Kancāne, egita.kancane suneits inbox.lv);
– nazkuru dīnu nu 7. da 18. septembra studentu orienteišonuos saceņseibys Reigā, vajadzeigi ļauds pi kontrolpunktim (Vita Briška, vita.briska suneits gmail.com);
– 18. septembrī “Taiseits Latgolā” Reigā, klubā “Depo” (Jurs Viļums, jureits suneits jureits.lv).

Aicynoju pīsavīnuot itim dorbim i paleidzēt itim cylvākim, kai ari pošam izdūmuot sovu dorbus i dalikt sovu placu!
Kai ari – ka Tev ir kaida spolvaina ideja, tok bais par variešonu, kūpā var vaira. Vīns nav dareituojs, a trokī var vysu.

NVO spāks ir kūpeigā dorbā, kasdīnā, prīcā, nūtikšonā – nav jāgys byut bīdram iz papeira. 😉
Tok ka pats nemekleisi, cyti Tovā vītā naatrass.

Lai breineiga vosora i rudiņs ar jaunu spāku!

Ilze Sperga,

LgSC vaļdis prīšksādātuoja

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.