Rss Feed Tweeter button Facebook button Youtube button
Latgolys Studentu centrs
Par LgSC dzeivi i sadzeivi
Fotoizstuode “Kas Tev ir Latveja?” niu apsaverama Šmakovkys muzejā Daugovpilī
Categories: Bez kategorejis

17.novembrī Šmakovkys muzejā Daugovpilī nūtyka bīdreibys “Latgolys Studentu centrs” veiduotuos fotoizstuodis “Kas Tev ir Latveja?” atkluošona. Niu izstuode muzeja apmaklātuojim apsaverama da 28. februara.

2015. godā bīdreiba “Latgolys Studentu centrs” svieteja sovu 10 godu pastuoviešonys jubileju. Tuos ītvorūs bīdri, aktivisti i cyti interesenti tyka aicynuoti īsyuteit kartenis fotokonkursam “Myusu Latveja”. Kūpumā konkursam tyka īsyuteitys 40 kartenis. Kotrai karteņai autori pīvīnuoja nalelus aprokstus, kas atspīgeļoj jūs pīdereibu sovam regionam i vaļstei. Konkursa rezultatā tyka radeita fotoizstuode, kurā apsaveramys 15 spylgtys kartenis.

Itūs div godu laikā fotoizstuode ceļuoja pa Latgolys pošvaļdeibu kulturys īstuodem i niu, pasasokūt Daugovpiļs piļsātys pošvaļdeibys tūrisma atteisteibys i informacejis agenturai, fotoizstuode da 2018. goda 28. februara apsaverama Šmakovkys muzejā Daugovpilī.

Izstuodis atkluošonys pasuokums 17. novembrī paguoja sirsneigā jutūnē. Ar muzykalim prīšknasumim apmaklātuojus prīcynuoja Daugovpiļs nūvoda kulturys centra “Vārpa” folklorys kūpa “Dyrbyni” (vadeituoja Anna Briška), sovpus meistarklasi šmakovkys darynuošonā pīduovoja zemnīku saimisteiba “Sēlija”. Juodasoka, ka tuos saiminīks Alberts Mendrikis naatpalyka nu muzykalūs “Dyrbynu” i vysus apmaklātuojus aicynuoja iz kūpeigu sasadzīduošonu.

Pasuokuma nūslāgumā vysi apmaklātuoji tyka aicynuoti iz ekskurseju, kurā beja vareiba dazynuot vaira na viņ par šmakovku kai vīnu nu senejuokūs styprūs alkoholiskūs dzierīņu Latgolā, bet ari atkluot mozuok zynomus faktus par Daugovpiļs i Latgolys viesturi.

Bīdreiba “Latgolys Studentu centrs” izsoka pateiceibu Dagnejai Dudarjonokai, Sandrai Švarcei i Gunai Gamazinai par īguļdeitū dorbu fotoizstuodis radeišonā i Daugovpiļs piļsātys pošvaļdeibys turisma atteisteibys i informacejis agenturai par vareibu izstuodi izvītuot Šmakovkys muzejā

 

 

 

Pastuosti cytim!

Leidzeigī roksti:

Leave a Reply