Daugavpiļs biroja kruosainais rudiņs
Jau kaidu strēči LgSC Daugavpiļs birojs reikoj daudzus kulturys pasuokumus. Par oktobri, novembri ir bejuš projektu raksteibys apvuiceibys, latgalīšu rokstu volūdys apvuiceibys, rodušuo darbneicis i dzejis i muzykys vokori, kinu vieršonuos i sasatikšonys ar dažaidim cylvākim.
Kai vīnu nu prioritatem LgSC ir izvirziejuse sovu bīdru izgleituošonys pasuokumus, deļ tam oktobrī nūtyka, projektu raksteišonys apvuiceibys i latgalīšu rokstu volūdys apvuiceibys. Apvuiceibys tyka organizātys naformalā veidā, tūs laikā jaunīši īgiva leluoku redziejumu iz projektu raksteibu, planavuošonu, ideju radeišonu. Latgalīšu rokstu volūdys apvuiceibuos tyka sataiseits „Pareizraksteibys nūsacejumu dečs”, kurs labi nūder „īmest aci” rokstūt tekstus latgaliski.
Oktobra suokuos ar sovom autordzīsmem i tekstim iz kopejneicu SĀTA i LgSC Daugavpiļs biroju beja atguojs A.Uškāns. Bez daleibys folklorys muzykys kūpuos „Laimas Muzykanti”, „Vabalis”, šlagergrupā „Patrioti LG” i cytūs muzykys projektūs, A.Uškāns pats sacer i izpylda sovys dzīsmis. Dzīsmu teksti i dzeja pi juo atajūt poša, tuos ir par apleicejū, par ceļojumim, par interesantim pastuoškim, kai pīvadumam, par taņti Martu, kura runuodama latgaliski izceļoj pa Franceju i Čikagu.
Oktobra vydā nūtyka ari kinu vokors, kur beja atguojs V.Lukaševičs i pastuosteja par kinu cikla „Citādi latviskais” taiseišonys aizkulisem, satyktajim cylvākim. Izaruoda, ka ari Latvejā var safiļmeit Antarktidu i daudzys piļsātys i vītys ir tyvuok na kai ruodīs, daudzi lobi sova omota meistari naprūtūt runuot kamerā i ka lobu kinu var sataiseit ari par mozu naudu.
Ar aicynojumu iz izamaukšonu oktobra beiguos LgSC sasauce Daugavpiļs apleicīņa ailinikūs iz kūpeigu dzejis vokoru „Tys navaineigais rudiņa striptizs”. Draudzeigā atmosferā, runojūt par tū, kas ir savareigi, ailinīki (E.T.Jonāne, V.Lukaševičs, Z.Lāce, J.Skrivļa-Čevere, L.Purinaša, K.Setinsone, A.Uškānss, L.Kilevica i c.) dalejuos ar sovom aiļom, taidā veidā it kai izamaucūt nu kasdīnā izlyktajom maskom i pīnuokumim. Ailinīki dalejuos sovūs raksteišonys nūslāpumūs i īdvasmys olūtūs. Tyka izrunuots kai ir tod, kod dzejai ir bezolgys atvalinojums, kuramā breidī jei atīt, kai jū salikt ar muzyku. Roduos dūma, ka ir dzejuli, kuri ir pošpītīkami, kurym nav vajadzeiga muzyka. V.Lukaševičs izsaceja dūmu, ka dzejūļs i muzyka ir kai pierts i dzeršona – obi naīt kūpā – vīnam ir juobyun golvonajam ūtram ir juobyun kai fonam (izjāmums asūt tautys dzīsmes). Pasuokuma nūslāgumā tyka izdareits secynojums, ka pošu dzeive ir kai vyseistuokuo dzeja…
Taipoš par LgSC Daugavpiļs biroju lelu interesei ir izruodejuš ari školāni i bārnim, par itū laiku iz biroju beja atguojuš vairuokys grupys ar bārnim i jaunīšim, kuri grybē izzynuot vairuok par pošu bīdreibu i pīsadaleit rodušajuos darbneicuos. LgSC Daugavpiļs birojs veļ aiziviņ sasadorboj ar jaunīšu folklorys kūpu „Dyrbyni” i reikoj latgalīšu daņčus.
Laikā da Zīmyssvātkim bīdreiba aicynoj vysus interesentus iz vakareišonom – rūkdorbu, sarunu i stuostu vokorim LgSC Daugavpiļs birojā i kopejneicā SĀTA. Novembra beiguos byus kinys „Vīna vosora deļ vysu” vieršonuos, a decembrī kai tradiceja Adventa laika literari muzykalais pasuokums. Vysa informaceja par gaidomajim pasuokumim byus sātyslopā i socialajūs teiklūs.
Dagneja