Rss Feed Tweeter button Facebook button Youtube button
Latgolys Studentu centrs
Par LgSC dzeivi i sadzeivi
Aizvadeits tradicionaluos kulturys i latgalīšu rokstu volūdys seminars
Categories: Bez kategorejis

Nu 4. da 6. septembra Leivuona nūvoda Rūžupē bīdreiba “Latgolys Studentu centrs” organizieja tradicionaluos kulturys i latgalīšu rokstu volūdys treju dīnu seminaru, kurymā pīsadaleja attīceigūs temu interesenti nu vysys Latvejis, nu pamatā dažaidu Latgolys vītu.

Seminara laikā beja vareiba pīsadaleit itaiduos nūdarbeibuos: tradicionaluo dzīduošona, tradicionaluo deja, tradicionalūs instrumentu spēle, latgalīšu rokstu volūda i izbraucīnā iz kulturviesturiski i myusu dīnuos nūzeimeigu Latgolys vītu. Seminarā pīsadaleja 18 interesentu nu Reigys, Rēzeknis, Kandavys nūvoda, Bierzpiļs, Salaspiļs, Vileks, Leivuona, Bukmuižys, Nagļu i Rūžupis.

Tradicionaluos dzīduošonys nūdarbeibuos seminara dalinīki vuicejuos gon dzīduošonys tehniku, gon tradicionalūs dzīšmu repertuaru, kurymā tyka likts izsvors iz Škilbanu i Bukmuižys pusis dzīsmem, kai ari dzīsmem nu Leivuona apleicīnis. Tradicionaluos dejis nūdarbeibuos tyka vuiceiti pošu reizi popularuokī danči, kai ari daudzpuoru dejis, bet instrumentu spēlis nūdarbeibuos varieja vuiceitīs kūklis, vejūlis, garmanis i bubyna spēli. Eipašs izsvors seminara nūrisē tyka lykts iz latgalīšu rokstu volūdys īsavuiceišonu – myusdīnu rokstu volūdys nūdarbeibuos seminara dalinīki vuicejuos kai gramatikys lykumus, tai raudzeja prakstisku rokstu volūdys izmontuošonu, kai ari analizieja latgalīšu volūdys atškireibys izlūksnēs i rokstu i mutvuordu formuos. Seminara pādejā dīnā tuo dalinīki īpazyna Rūžupis apleicīnis kulturviesturiskuos vītys, nu kurūs vysu spylgtuokuo beja gasteišona Vogonu bazneicā. Itymā bazneicā sovulaik kolpuoja bazneickungs Ontons Juhnevičs, par kuruo atpazeistameibu pādejā laikā juosoka paļdis kinai “Segvārds vientulis”. Vonogu bazneicā kai reizi nūtyka ari kinā paruodeitī nūtykumi. Taipat seminara dalinīki apsaviere ari vīnu nu Preiļu pusis popularuokūs turisma objektu – glīmežu audzātovu, kab īpazeitu myusdīnu Latgolys saiminīku nūsadorbuošonu.

Tradicionaluos kulturys i latgalīšu rokstu volūdys seminars eistynuots ar Vaļsts kulturkapitala fonda atbaļseituo projekta “Atbalsts biedrībai “Latgolys Studentu centrs” latgaliešu kultūras popularizēšanai 2015. gadā” podturiešonu.

Ceidari Rozupe (4 of 135)

Ceidari Rozupe (33 of 135)

Ceidari Rozupe (37 of 135)

Ceidari Rozupe (44 of 135)

Ceidari Rozupe (49 of 135)

Ceidari Rozupe (63 of 135)

Ceidari Rozupe (98 of 135)

Ceidari Rozupe (110 of 135)

Leidzeigī roksti:

Leave a Reply